कोशीका मुख्यमन्त्री हिक्मत कार्कीले सुनसरी देवानगन्जस्थित कप्तानगन्ज घटनाप्रति दुःख प्रकट गर्दै नेपाल सरकारलाई अविलम्ब आवश्यक सुरक्षा व्यवस्था मिलाउन र जनताको जिउधनको रक्षा गर्न अनुरोध गरेका छन्।
सबैलाई संयमित रहन आग्रह गर्दै उनले सद्भाव कायम गर्न आह्वान गरेका छन्।
सोमबार विज्ञप्ति जारी गर्दै मुख्यमन्त्री कार्कीले अपुष्ट सूचना वा अफवाहको पछि नलाग्न पनि आग्रह गरेका छन्।
‘सदियौँदेखि हामी नेपाली जाति, भाषा, धर्म र संस्कृतिलाई सम्मान गर्दै एकताबद्ध हुँदै आएका छौँ,’ मुख्यमन्त्री कार्कीले भनेका छन्, ‘यस परिवेशमा घटनालाई उत्तेजित नबनाई संयमतापूर्वक सामाजिक तथा साम्प्रदायिक सद्भाव कायम राख्न सबै सरोकारवाला, नागरिक समाज, राजनीतिक दल, जनप्रतिनिधि र सञ्चारकर्मीहरूमा हार्दिक अनुरोध गर्दछु।’
प्रदेश सरकार पीडित परिवार र घाइतेहरूको साथमा रहेको जनाउँदै उनले आवश्यक समन्वय र सहयोगका लागि प्रतिबद्ध रहेको उल्लेख गरेका छन्।
