राप्रपा अध्यक्ष राजेन्द्र लिङ्देनले सुनसरीको देवानगञ्ज गाउँपालिका–३ कप्तानगञ्जमा भएको घटनामा संलग्नमाथि छानबिन गरी कारबाही गर्न माग गरेका छन्।
आज एक विज्ञप्ति जारी गर्दै अध्यक्ष लिङ्देनले भनेका छन्, ‘यस घटनाको सत्यतथ्य, निष्पक्ष, स्वतन्त्र र पारदर्शी ढङ्गबाट छानबिन गरी कानुनविपरीत हिंसा भड्काउने, हत्या, आगजनी वा सामाजिक सदभाव बिथोल्ने जुनसुकै व्यक्ति वा समूह भए पनि कानुनबमोजिम कडा कारबाही गरिनुपर्छ भन्ने हाम्रो स्पष्ट धारणा छ।’
कप्तानगञ्जमा एक जनाको मृत्यु र १२ जना घाइते भएका थिए।
यस्तो छ विज्ञप्ति-
सुनसरी जिल्लाको देवानगञ्ज गाउँपालिका–३, कप्तानगञ्जमा हालै भएको हिंसात्मक घटनाका क्रममा एक नेपाली युवाले दुःखद रूपमा ज्यान गुमाएको तथा अन्य केही व्यक्तिहरू घाइते भएको घटनाले राष्ट्रिय प्रजातन्त्र पार्टीलाई अत्यन्त मर्माहत र चिन्तित बनाएको छ।
यस दुःखद घडीमा ज्यान गुमाउने मृतकहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछु।
साथै, घाइतेहरूको शीघ्र स्वास्थ्यलाभको कामना गर्दछु।
राष्ट्रिय प्रजातन्त्र पार्टी मृतकका परिवारलाई यथोचित राहत, क्षतिपूर्ति र न्यायको सुनिश्चितता गर्न तथा घाइतेहरूको निःशुल्क, प्रभावकारी र गुणस्तरीय उपचारको तत्काल व्यवस्था गर्न सरकारसंग जोडदार माग गर्दछ।
यस घटनाको सत्यतथ्य, निष्पक्ष, स्वतन्त्र र पारदर्शी ढङ्गबाट छानबिन गरी कानुनविपरीत हिंसा भड्काउने, हत्या, आगजनी वा सामाजिक सदभाव बिथोल्ने जुनसुकै व्यक्ति वा समूह भए पनि कानुनबमोजिम कडा कारबाही गरिनुपर्छ भन्ने हाम्रो स्पष्ट धारणा छ।
दण्डहीनताको संस्कृतिले यस्ता घटनालाई थप प्रोत्साहन गर्ने भएकाले दोषीलाई कुनै पनि बहानामा उन्मुक्ति दिनु हुँदैन। विशेषतः तराई–मधेसका विभिन्न क्षेत्रमा चाडपर्व वा धार्मिक अवसरका बेला पटक–पटक तनाव, हिंसा र साम्प्रदायिक विवाद उत्पन्न हुने क्रमप्रति हाम्रो गम्भीर ध्यानाकर्षण भएको छ।
हरेक घटनाको निशानामा हिन्दु समुदायलाई बनाइनु दुःखद, आपत्तिजनक र रहस्यमय छ। हिन्दु समुदाय लक्षित घटनाहरुको हामीले शुरुआती अवस्थादेखि नै अत्यन्त सुक्ष्म ढंगबाट हेरिराखेका छौं। धार्मिक संवेदनशीलतामाथि प्रहार भइरहेको यस्ता घटनाको कारण, पृष्ठभूमि, योजनाबद्ध पक्ष, सुरक्षा व्यवस्थाका कमजोरी तथा प्रशासनिक उत्तरदायित्वसमेतको गहिरो अध्ययन गरी समस्याको जरासम्म पुगेर दीर्घकालीन समाधान खोज्न सरकारसंग राप्रपा आग्रह गर्दछ।
पटक-पटक दोहोरिरहेको यस्ता घटनालाई सधैंको लागि अन्त्य गर्न सर्वपक्षीय समिति बनाइ सरकारले तत्काल संवादको थालनी गरोस् र आगामी दिनमा यसप्रकारका घटना नहुने सुनिश्चितता प्रदान गरोस् भन्ने राप्रपाको धारणा रहेको छ।
प्रत्येक नेपालीले आफ्नो धर्म, संस्कृति र परम्पराको अभ्यास संविधान र कानुनले सुनिश्चित गरेको अधिकारभित्र रही निर्भयपूर्वक गर्न पाउने वातावरण राज्यले सुनिश्चित गर्नुपर्दछ। तर, श्रृंखलाबद्ध हिंसात्मक घटनाप्रति राज्यको उदासीनताका कारण देश द्वन्द उन्मुख हुने सम्भावनाले हामीलाई अति चिन्तित तुल्याएको छ।
राप्रपा हिंसा, अराजकता र साम्प्रदायिक द्वेषको राजनीति कुनै पनि रूपमा स्वीकार गर्दैन। सदियौंदेखि कायम रहेको धार्मिक सहिष्णुता, राष्ट्रिय एकता, सामाजिक सदभाव, विधिको शासन र नागरिक सुरक्षाको पक्षमा दृढतापूर्वक उभिँदै आम जनतामा शान्ति, सुरक्षा र न्यायको प्रत्याभूति गराउन आवश्यक सम्पूर्ण कदम तत्काल चाल्न सरकारसंग पुनः आग्रह गर्दछु।
साथै, परिस्थितिको संवेदनशीलतालाई ध्यान दिई सामाजिक एकता, आपसी सदभाव र संयम कायम राख्न आम जनसमुदायलाई अपील गर्दछु।
राजेन्द्र लिङ्देन, अध्यक्ष, राष्ट्रिय प्रजातन्त्र पार्टी
