प्रमुख निर्वाचन आयुक्तमा सिफारिस मानबहादुर कार्कीसहित प्रस्तावित दुई आयुक्तहरूको नाम बुधबारको संसदीय सुनुवाइ समितिले सर्वसम्मत रूपमा अनुमोदन गर्ने निर्णय गरेको छ।
संवैधानिक परिषदले तीन जना आयुक्तहरूको नाम सिफारिस गर्ने निर्णय गरेपछि संसदीय सुनुवाइ समितिमा सुनुवाइ गरी ती नामहरू अनुमोदन गरिएको हो।
प्रमुख निर्वाचन आयुक्तमा अनुमोदन भएका कार्की महान्यायाधीवक्ता कार्यालय र सर्वोच्च अदालतमा कार्यरत थिए। उनी सर्वोच्चको रजिस्ट्रार पनि थिए।
साथै आयुक्तमा प्रस्तावित राजिब सुब्बा र गुरूप्रसाद वाग्ले पनि सर्वसम्मत रूपमा अनुमोदन भएका छन्।
वाग्ले र सुब्बाको मंगलबार र कार्कीको बुधबार संसदीय सुनुवाइ भएको हो।
कार्कीविरूद्ध सर्वोच्च रजिस्ट्रार हुँदा मुद्दा दरपीठ गरेकोबारे उजुरी थियो।
प्रमुख निर्वाचन आयुक्तमा अनुमोदन भएका कार्कीले संसदीय सुनुवाइका क्रममा आफूले निर्वाचन आयोग सम्हालेपछि निर्वाचनहरू निष्पक्ष हुने विश्वास दिलाएका थिए।
‘धाँधली भयो भन्ने म गएपछि हुँदैन, विदेशबाट मतदान र मेसिनबाट मतदान हुने व्यवस्था मिलाउँछौं, बदर मत घट्छ,’ उनले भने।
आफूले जीवनमा निष्पक्षता र स्वतन्त्रता सिकेको उल्लेख गर्दै उनले त्यही मान्यता बोक्ने संवैधानिक अंग आयोग भएको बताएका थिए।
समिति सभापति बोधनारायण श्रेष्ठले किन निर्वाचन आयोग जान लाग्नुभएको भनेर प्रश्न सोधेका थिए। जबाफमा कार्कीले भने, ‘व्यक्तिगत रूपमा हामी जागिरे मानिस हौं, मेरो अवधि पनि बढ्छ। जागिरे मनोवृत्ति पनि हुन्छ। काम गर्छु भन्ने अठोट पनि छ।’
उनले आयोगलाई रूपान्तरण गर्न पनि बताएका थिए।
उनले बेजिल्ला र विदेशबाट मतदान गर्ने व्यवस्थाका लागि पहिले कानुन चाहिने पनि बताए।
‘बेजिल्लाबाट मतदान र विदेशबाट मतदान गर्ने व्यवस्थाका लागि पहिले कानुन चाहिन्छ, यसबारे दलहरूसँग पनि छलफल गर्नुपर्छ, आयोगले पनि होमर्क गर्नुपर्छ, विदेशमा कहाँ कति मतदाता छन् तथ्यांक छैन,’ उनले भने।
कानुन उपलब्ध भएका खण्डमा आफ्नो कार्यकालभर बेजिल्ला र विदेशबाट मतदानको व्यवस्था मिलाउन सक्ने उनले बताएका थिए।
