प्रतिनिधि सभा बैठकको पूर्वसन्ध्यामा सभामुख डोलप्रसाद अर्यालले प्रधानमन्त्री बालेन शाहदेखि प्रतिपक्षी दलका नेताहरू र प्रमुख सचेतकहरूसँग छलफल गरेका छन्।
सभामुख अर्यालले प्रधानमन्त्री शाह तथा नेकपा (एमाले) का संसदीय दलका नेता रामबहादुर थापासँग आज छुट्टाछुट्टै भेटवार्ता गरेका थिए।
साथै अर्यालले विपक्षी दलका नेता भीष्मराज आङदेम्बे तथा नेपाल कम्युनिष्ट पार्टीका नेता वर्षमान पुनसँग मंगलबार छुट्टाछुट्टै भेटवार्ता गरेका थिए।
भेटवार्ताका क्रममा प्रतिनिधि सभाको बैठकलाई थप प्रभावकारी, मर्यादित र परिणाममुखी बनाउने विषयमा छलफल भएको सभामुखको सचिवालयले जनाएको छ।
त्यसैगरी, मंगलबार नै सभामुख अर्यालले विभिन्न दलका प्रमुख सचेतक तथा सचेतकहरूसँग पनि छलफल गरेका थिए।
छलफलमा प्रतिनिधि सभाको कार्य सञ्चालनलाई थप प्रभावकारी बनाउने तथा आगामी बैठकका कार्यसूचीलाई व्यवस्थित ढङ्गले अघि बढाउने विषयमा विचार आदानप्रदान भएको थियो।
प्रतिनिधि सभा बैठक बिहीबार बस्दैछ।
