सुनसरीको देवानगन्ज गाउँपालिका–३, कप्तानगन्जमा उत्पन्न तनाव र त्यसपछिको हिंसात्मक झडपप्रति नागरिक समाज र मानव अधिकार समुदायले गम्भीर चिन्ता व्यक्त गरेका छन्।
राष्ट्रिय मानव अधिकार आयोगका पूर्व आयुक्त सुशील प्याकुरेल, वरिष्ठ पत्रकार कनकमणि दीक्षित, मानव अधिकार अभियन्ता शोभाकर बुढाथोकीसहित २६ जना नागरिक अगुवाहरूले बुधबार संयुक्त प्रेस विज्ञप्ति जारी गर्दै घटनाको स्वतन्त्र छानबिन गर्न र आपसी सहिष्णुता कायम राख्न सरकार तथा सर्वसाधारणसँग अपिल गरेका हुन्।
विज्ञप्तिमा साउन १० गते राति प्रदर्शन नियन्त्रणका क्रममा सशस्त्र प्रहरी र नेपाल प्रहरीले चलाएको गोली लागेर स्थानीय ओमप्रकाश मेहताको मृत्यु भएको घटनाप्रति गम्भीर खेद प्रकट गरिएको छ।
नागरिक समाजका प्रतिनिधिहरूले दंगा नियन्त्रणका लागि अपनाउनुपर्ने वैकल्पिक उपायहरू पर्याप्त रूपमा प्रयोग नगरी सिधै घातक गोली चलाइएको भन्दै सुरक्षा संयन्त्रको भूमिकामाथि प्रश्न उठाएका छन्।
अधिकांश घाइतेहरूको कम्मरभन्दा माथि गोली लागेको अवस्था रहेकाले सुरक्षा निकायले आवश्यक संयमता अपनाउन नसकेको ठहर विज्ञप्तिमा गरिएको छ।
विज्ञप्तिका हस्ताक्षरकर्ताहरूले प्रशासनिक तहको छानबिन समितिले मात्र नागरिकमा पर्याप्त विश्वास जगाउन नसक्ने भएकाले निष्पक्ष, स्वतन्त्र र उच्चस्तरीय आयोग गठन गर्न माग गरेका छन्।
त्यस्तै, घाइतेहरूको प्राथमिकताका साथ निःशुल्क उपचारको व्यवस्था गर्न र मृतकका परिवारलाई उचित राहत, क्षतिपूर्ति एवं न्याय सुनिश्चित गर्न माग गरिएको छ।
विज्ञप्तिमा नेपाल प्रहरी र सशस्त्र प्रहरीको मनोबल उच्च राखेर काम गराउनुपर्नेमा सिधै नेपाली सेना परिचालन गर्दा आन्तरिक सुरक्षा निकायको आत्मबल कमजोर भएको भन्दै सरकारले यसको औचित्य स्पष्ट गर्नुपर्ने उल्लेख छ।
गृहमन्त्रीले सीमा क्षेत्रको भ्रमण गरेलगत्तै यस्तो घटना हुनुले गृह प्रशासन नागरिक सुरक्षाप्रति पर्याप्त संवेदनशील र प्रभावकारी हुन नसकेको नागरिक अगुवाहरूको भनाइ छ।
'यति गम्भीर परिस्थिति बन्दा पनि राष्ट्रिय सुरक्षा परिषद बैठक नबस्नुले सरकार अन्तरसामुदायिक सद्भाव कायम गर्न गम्भीर नभएको अनुभूति गराएको छ,' विज्ञप्तिमा उल्लेख छ।
नागरिक अगुवाहरूले खुला सीमानाका कारण हुन सक्ने कुनै पनि प्रकारको उक्साहट, प्रलोभन तथा घुसपैठप्रति सरकार र नागरिक दुवैलाई सचेत रहन आग्रह गर्दै नेपालको मौलिक सामाजिक बनोट र आपसी सद्भावलाई जोगाइराख्न अपिल पनि गरेका छन्।
विज्ञप्तिमा सुशील प्याकुरेल, कनकमणि दीक्षित, शोभाकर बुढाथोकी, विकास बस्नेत, सुशील बी.के., डा. विद्या चापागाईं, भक्त विश्वकर्मा, नरेन खतिवडा, धनबहादुर मिजार, गणेश धामी, मनिषा ढकाल, सिम्रन सेरचन, नीतु पोखरेल, अश्मिता सापकोटा, इन्दु तुलाधर, रिजन राना मगर, कृष्ण गौतम, अभिषेक अधिकारी, डा. गोपालकृष्ण शिवाकोटी, पवन गौतम, रियाब बनियाँ, मो. नइम राईन, भगवती अधिकारी, श्यामकुमारी साह, भोला पासवान र सोम निरौलाले हस्ताक्षर गरेका छन्।
-1785323296.jpg)
