राप्रपा प्रमुख सचेतक खुस्बु ओलीले सुनसरीको कप्तानगञ्जमा गोली लागेर युवाको ज्यान गएको प्रधानमन्त्री बालेन शाहले स्वीकार गर्दै फेसबुकमा स्टाटस राखेको भन्दै गोली चलाउन कसले आदेश दियो भन्ने प्रश्न गरेकी छन्।
घटनाबारे छानबिन नै नगरी प्रधानमन्त्रीले स्टाटस राखेको पनि उनले बताइन्।
‘यो समयमा के देशले प्रधानमन्त्रीको अभिभावकत्व खोजिरहेको छैन? यही हो जिम्मेवारी? योभन्दा डरलाग्दा घटनाहरू आउँदा विगतमा प्रधानमन्त्री र राष्ट्राध्यक्षले सम्बोधन गर्थे तर आज उहाँ कुन खोपीमा बस्नुभएको छ? प्रधानमन्त्रीले फेसबुकबाट गोली प्रहारबाट ज्यान गएको स्वीकार गर्नुभएको छ। यदि गोली प्रहरीले चलाएको भए त्यसको आदेश कसले दियो?,’ आजको प्रतिनिधि सभा बैठकमा उनले प्रश्न गरिन्, ‘प्रहरीको गोलीले मरेको हो कि होइन भनेर छानबिन बिना उहाँले फेसबुकमा कसरी भन्न सक्नुहुन्छ, यही हो परिपक्वता प्रधानमन्त्रीको? गोली कसले चलायो हामीले जान्न पाउनुपर्छ।’
उनले रास्वपा सभापतिले बुधबार सिंहदरबारमा सर्वदलीय बैठक राखे पनि त्यहाँ गृहमन्त्री नआएको बताइन्।
साथै सुनसरी घटनाबारे गहिरोसँग छानबिन गर्न उच्चस्तरीय आयोग गठन गर्नुपर्ने उनको भनाइ छ।
‘मेयरले बिजुली लाइन काटेपछि गोली चलेको भन्छन्, सिडिओले गोली चलाउने आदेश दिएको छैन भन्छन्, नेपाल प्रहरीले हवाई फायर मात्रै गरेको भनेको छ त्यसो भए गोली कसरी चल्यो?,’ उनले भनिन्, ‘सत्यतथ्य सार्वजनिक गर्न उच्चस्तरीय छानबिन आयोग गठन गर्नुपर्छ।’
