प्रतिपक्षी दल नेपाली कम्युनिस्ट पार्टी (नेकपा) का संसदीय दल नेता पुष्पकमल दाहाल 'प्रचण्ड' ले प्रधानमन्त्री बालेन शाहले अन्य दल र बुद्धिजीविहरूसँग संवाद र सहकार्य नगरेको विषयमा प्रश्न उठाएका छन्।
बिहीबार प्रतिनिधिसभा बैठकमा बोल्दै प्रचण्डले नेपालमा धेरै अनुभवबाट गुज्रिएका नेताहरू, विज्ञ र बुद्धिजीवीहरूको विशाल पंक्ति भए पनि प्रधानमन्त्री बालेन शाहले उनीहरूसँग संवाद नै नगरेकामा प्रश्न उठाएका हुन्।
'ठुल्ठूला अप्ठ्यारा परिस्थितिलाई निकास दिने हैसियत क्षमता राख्ने नेताहरूको पंक्ति छ। सुशासन र सामाजिक न्यायको निम्ति लड्ने नेताहरूको पंक्ति पनि छ। लोकतन्त्रको निम्ति झन्डै ७० वर्षदेखि जेल, नेल, यातना थुप्रै थुप्रै भोगेका नेताहरूको पंक्ति छ। उनीहरूको अनुभव लिन, उनीहरूसँग सहकार्य गर्न, उनीहरूसँग संवाद गर्न प्रधानमन्त्रीलाई के ले रोकेको होला?' उनले प्रश्न गरे।
'उहाँले मलाई बोलाएर तपाईंले पनि भ्रष्टाचारविरूद्ध अभियान त चलाउनुभएको थियो। केले रोक्यो भनेर सोधे पनि त हुन्थ्यो,' प्रचण्डले अगाडि भने, 'आफ्नै अहंकारले रोकेको हो कि, म पर्याप्त हो, कोही चाहिँदैन भन्ने खालको हो कि? यदि त्यसो हो भने दुर्भाग्य हो।'
प्रचण्डले कांग्रेस, एमाले र अरू दलहरूमा पनि संघर्षका धेरै अनुभव छन्, जुन अहिलेको सरकारका लागि धेरै ठूलो सहयोग हुन सक्ने बताए।
'त्यो अनुभव लिन कन्जुस्याइँ गर्नुपर्ने कुनै कारण छ र? जति उदार मनले काम गर्न सक्यो त्यति देशको पनि, जनताको पनि र तपाईंहरूको पनि हित हुनेवाला छ। तपाईंहरू जति संवादबाट टाढा जानुहुन्छ, जति प्रतिपक्षलाई अवमूल्यन वा अपमानित गर्नुहुन्छ, जनताको एउटा तह, वर्ग, तप्कालाई बेवास्ता गर्ने कोसिस गर्नुहुन्छ, त्यति राष्ट्र पनि, जनता पनि र तपाईं हामी सबै अप्ठ्यारोमा पर्छौं,' प्रचण्डले भने।
उनले कतिपय अभिव्यक्तिले असहज भए प्रधानमन्त्रीले संसदमा उभिएर स्पष्टीकरण दिने लोकतान्त्रिक परम्परा भएकाले स्पष्टीकरण दिनुपर्ने पनि बताएका छन्।
जेठ १७ मा संसदको रोस्ट्रममा उभिएर प्रधानमन्त्री बालेन शाहले 'नेपालले पनि भारतको जग्गा मिचेको रहेछ' भन्ने अभिव्यक्ति दिएपछि प्रतिपक्षी दलहरूले यसको प्रमाण पेस गर्न यो रेकर्डबाट हटाउन माग गर्दै आइरहेका छन्। त्यसतर्फ लक्ष्य गर्दै नेकपा संयोजक तथा पूर्वप्रधानमन्त्री दाहालले संसदमा भने, 'प्रधानमन्त्रीका कतिपय अभिव्यक्तिले असहज बनाएको छ भने प्रधानमन्त्रीले सदनमा उभिएर स्पष्टीकरण दिनुपर्छ। यो लोकतान्त्रिक परम्परा हो, यसलाई भाँच्ने कोसिस र उल्टाउने कोसिस नगरियोस्।'
उनले प्रधानमन्त्रीले स्पष्टीकरण दिएर सानो हुने नभई बरू त्यसले कद माथि लैजाने पनि बताए।
'तपाईं आएर संसदमा स्पष्टीकरण दिएर सानो हुने होइन, बरू कद माथि जान सक्छ। प्रतिपक्षसँग संवाद गरेर कद सानो हुने होइन बरू बढेरै जान्छ,' उनले भने, 'यसलाई बुढापाकाको कुरा भन्ठान्नुहुन्छ भने 'कुरा सुन्नु बुढाको आगो ताप्नु मुढाको' भन्ने उखान हजारौं वर्षको अनुभवले ल्याएको भन्ने ठान्नुस्।'
देशलाई सफल वा असफल के बनाउने प्रधानमन्त्री र रास्वपाको हातमा रहेको पनि उनले बताए।
'देशलाई कता लैजाने तपाईंकै हातमा छ। रास्वपाको कामकारबाही कता जान्छ, असफल राष्ट्र बनाउने कि नबनाउने तपाईंको हातमा छ, जनताले हेरिरहेका छन्,' उनले भने।
प्रधानमन्त्रीले प्रतिपक्षीहरूसँग पनि संवाद नगरेको उनको भनाइ थियो। सरकारका कतिपय काम-कारबाहीले जनता झस्किन थालेको पनि उनले बताए।
-1785396818.jpg)
