नेपाली कांग्रेसको १५औँ महाधिवेशनअन्तर्गत दोलखामा भएको क्षेत्रीय अधिवेशनको निर्वाचन परिणाम बदर गर्न माग गर्दै १५ जना उम्मेदवारले केन्द्रीय निर्वाचन समितिमा निवेदन दिएका छन्।
उम्मेदवारहरूले दोलखाको निर्वाचन समितिले विधान र निर्वाचन निर्देशिकाविपरीत आफूहरूलाई जानकारी नै नदिई केही पदमा निर्विरोध निर्वाचित भएको घोषणा गरेको आरोप लगाएका छन्। आफूहरूले उम्मेदवारी फिर्ता नलिएको र सर्वसम्मतिका लागि सहमति पनि नदिएको उनीहरूको दाबी छ।
उम्मेदवारी दर्तापछि निर्वाचन समितिले उम्मेदवारहरूको अन्तिम नामावलीसमेत प्रकाशित गरेको उल्लेख छ। त्यसपछि मतदान गर्ने कार्यतालिका भए पनि सहमतिको प्रयास गर्ने भन्दै समय बिताइएको र अन्ततः मतदान नै नगरी निर्विरोध निर्वाचित भएको परिणाम सार्वजनिक गरिएको उनीहरूको भनाइ छ।
उम्मेदवारहरूले दोलखामा उम्मेदवारी दर्ताका लागि ५७ हजार रुपैयाँसम्म दस्तुर लिइएको विषयमा पनि प्रश्न उठाएका छन्। कांग्रेस केन्द्रीय निर्वाचन समितिले असोज १० गते अतिरिक्त रकम लिन नपाइने र लिइसकेको भए सम्बन्धित व्यक्तिलाई फिर्ता गर्न निर्देशन दिएको भए पनि दोलखामा उक्त रकम लिइएको उनीहरूको दाबी छ।
निवेदनमा रकम नबुझाए मनोनयनपत्र दर्ता नगर्ने भनिएपछि आफूहरूले बाध्य भएर रकम बुझाएर उम्मेदवारी दिएको उल्लेख गरिएको छ। कतिपय आकांक्षीहरू रकम अभावका कारण उम्मेदवारी दिनबाटै वञ्चित भएको दाबीसमेत गरिएको छ।
उम्मेदवारहरूले आफूहरूको उम्मेदवारी कायम रहेकै अवस्थामा गरिएको निर्विरोध निर्वाचित घोषणा विधान र निर्वाचन निर्देशिकाविपरीत भएको भन्दै उक्त परिणाम बदर गर्न माग गरेका छन्। साथै, बाँकी निर्वाचन प्रक्रिया विधिसम्मत रूपमा अघि बढाउन उनीहरूले केन्द्रीय निर्वाचन समितिसमक्ष माग गरेका छन्।
उनीहरूले सानेपास्थित केन्द्रीय कार्यालय पुगेर केन्द्रीय निर्वाचन समितिमा निवेदन बुझाएका हुन्।
