नेपाली कम्युनिस्ट पार्टीका नेता तथा पूर्वप्रधानमन्त्री झलनाथ खनालले आफू नेकपामै रहेको बताएका छन्।
सेतोपाटीसँग कुराकानी गर्दै आज उनले आफूले नेकपा परित्याग नगरेको पनि बताए।
‘मैले पार्टी छाडेको छैन, अहिले पनि म नेकपामै छु, मैले नेकपामै रहेर समाजवादी जागरण अभियान थालनी गरेको हो,’ उनले भने, ‘अरू धेरै साथीभाइहरू विभिन्न पार्टीमा छन् र पार्टीमा रहँदारहँदै यो अभियानमा संलग्न भएका छन्। त्यसो हुनाले पार्टी छाडेको छैन।’
पूर्वप्रधानमन्त्री खनाल आज समाजवादी जागरण अभियान भेलामा सहभागी भएका थिए।
उनले आफूले पार्टी नछाड्ने पनि बताए।
‘मैले पार्टी छाड्दिनँ, २०२६ सालमा मैले पार्टी सदस्यता लिएको, अनि त्यो कम्युनिस्ट पार्टी किन छोड्छु र, कहिल्यै छाड्दिनँ,’ उनले भने।
उनकाअनुसार समाजवादी जागरण अभियानबाट नेकपालाई एकीकृत गर्न भूमिका खेल्ने उनले बताए।
‘अहिले कम्युनिस्ट आन्दोलनमा हाबी भएको दक्षिणपन्थी अवसरवादलाई हटाउने र क्रान्तिकारी कार्यदिशा, नीति र सिद्धान्तलाई अघि बढाउने र नेपाली विशेषताको समाजवाद स्थापना गर्नका निम्ति कम्युनिस्टहरूलाई एकताबद्ध बनाउने हो,’ उनले भने।
.JPG)
