नेपाली कांग्रेसको १५औँ महाधिवेशनबाट निर्वाचित पदाधिकारी र केन्द्रीय सदस्यहरूले आठ बुँदे लिखित प्रतिज्ञा गरेका छन्।
पार्टीको केन्द्रीय कार्यालय सानेपामा बिहीबार केन्द्रीय निर्वाचन समितिले नवनिर्वाचित पदाधिकारी तथा केन्द्रीय सदस्यहरूलाई निर्वाचित भएको प्रमाणपत्र प्रदान गरेको थियो। सोही क्रममा पार्टी सभापति गगन थापाले उनीहरूलाई शपथ गराएका थिए।
केन्द्रीय कार्यसमितिका पदाधिकारी तथा सदस्यहरूलाई पार्टी, समाज र राष्ट्रप्रतिको जिम्मेवारी निर्वाह गर्ने प्रतिबद्धतासहित लिखित प्रतिज्ञा गर्न लगाइएको थियो।
यस्तो छ प्रतिज्ञा-
१. म संघीय लोकतान्त्रिक गणतन्त्र नेपालको संविधानप्रति पूर्ण प्रतिबद्ध रहँदै देश र जनताको हितलाई ध्यानमा राखी संविधानले तोकेका नागरिक कर्तव्यहरू इमानदारीपूर्वक पालना गर्नेछु।
२. म नेपाली कांग्रेसको विधान, सिद्धान्त र ‘समुन्नत नेपाल र सम्मानित नेपाली’ को लक्ष्यप्रति समर्पित रही पार्टीको लक्ष्य र उद्देश्य पूरा गर्न सक्रियतापूर्वक तथा कुशलतापूर्वक आफ्नो पदीय जिम्मेवारी पूरा गर्नेछु।
३. म पार्टीको नीति तथा निर्देशनबमोजिम पार्टीका कार्यक्रम, अभियान र गतिविधिहरूमा सक्रियतापूर्वक सहभागी हुनेछु।
४. म पार्टीको अनुशासन पालना गर्नेछु तथा संगठनात्मक निर्णयको सम्मान गर्दै तिनको कार्यान्वयन गर्नेछु।
५. म नेपालको संविधान तथा प्रचलित कानुनले निषेध गरेका कुनै पनि कार्यमा संलग्न हुने छैन र आफ्नो क्षमताअनुसार त्यस्ता कार्य रोक्न प्रयास गर्नेछु। साथै, पार्टी र समाजलाई जोड्दै सामाजिक कार्यमा सक्रिय रहनेछु।
६. म पार्टीको विधानविपरीत हुने कुनै पनि गतिविधिमा संलग्न हुने छैन र त्यस्ता गतिविधिविरुद्ध उभिनेछु।
७. म सधैँ सत्यनिष्ठा, जिम्मेवारी र लोकतान्त्रिक मूल्य–मान्यताप्रति प्रतिबद्ध रहनेछु।
८. म पार्टी, समाज र राष्ट्रको हितमा इमानदारीपूर्वक काम गर्नेछु।
-1793266775.jpg)
