राष्ट्रिय प्रजातन्त्र पार्टी (राप्रपा) ले आठौं केन्द्रीय महाधिवेशन उद्घाटन समारोह काठमाडौंको खुलामञ्चमा गर्ने भएको छ।
पार्टी प्रवक्ता मोहनकुमार श्रेष्ठले सेतोपाटीलाई दिएको जानकारीअनुसार महाधिवेशन उद्घाटन खुलामञ्चमा र बन्दसत्र भृकुटीमण्डपमा आयोजना हुनेछ।
‘महाधिवेशन उद्घाटन खुलामञ्च र बन्दसत्र प्रदर्शनीमार्थस्थित भृकुटीमण्डपमा गर्छौं,’ उनले भने, ‘महाधिवेशनमा ४ हजारभन्दा बढी प्रतिनिधिहरू सहभागी हुनु हुनेछ।’
राप्रपाले प्रत्येक प्रदेश सभा क्षेत्रबाट महाधिवेशन प्रतिनिधि तय गर्ने गर्छ।
प्रदेश सभा निर्वाचन क्षेत्रभित्रका सक्रिय सदस्यहरूमध्येबाट ३ जना महिला, १ जना उत्पीडित, समावेशीबाट २ जना, खुला ३ जना गरी कूल ९ जनाका दरले महाधिवेशन प्रतिनिधि चुनिएर आउने व्यवस्था छ।
मुलुकमा ३३० प्रदेश सभा क्षेत्र छ। यीमध्ये करिब ३ सय क्षेत्रबाट ९ जनाका दरले महाधिवेशन प्रतिनिधिहरू आउने तय भएको छ। सक्रिय सदस्य नपुगेका करिब ३० क्षेत्रबाट भने पदेनबाहेक प्रतिनिधि सहभागी हुन पाउने छैनन्।
विधानअनुसार स्थानीय, प्रदेश सभा क्षेत्र, प्रतिनिधि सभा क्षेत्र, जिल्ला र प्रदेशबाट पदेन महाधिवेशन प्रतिनिधि आउने व्यवस्था छ। सक्रिय सदस्य नपुगेका ठाउँबाट पनि पदेन प्रतिनिधिहरू भने महाधिवेशनमा आउन पाउनेछन्। प्रवासबाट पनि प्रतिनिधि आउने व्यवस्था छ।
‘यसरी ४ हजारभन्दा बढी महाधिवेशन प्रतिनिधि महाधिवेशनमा सहभागी रहनुहुनेछ,’ उनले भने, ‘प्रतिनिधिहरूलाई खानालगायत आवश्यक व्यवस्थापन पार्टीले गर्छ।’
राप्रपाले २०७८ मंसिरमा सातौं महधिवेशन गरेको थियो। उक्त महाधिवेशनमा कमल थापालाई हराउँदै राजेन्द्र लिङ्देन अध्यक्ष निर्वाचित भएका थिए। त्यसलगत्तै थापाले राप्रपा परित्याग गरे पनि अहिले उनी राप्रपामै समाहित भएका छन्।
आठौं महाधिवेशनमा अध्यक्ष पदमा सर्वसम्मत हुने सम्भावना कम रहेको नेताहरू बताउँछन्। लिङ्देन पुन: एक कार्यकाल अध्यक्षमा दोहोरिन चाहेका छन्। उपाध्यक्ष विक्रम पाण्डे र संसदीय दल नेतासमेत रहेका प्रवक्ता ज्ञानेन्द्र शाही पनि अध्यक्ष पदमा उम्मेदवारी दिने तयारीमा छन्।