नेकपा एमालेका अध्यक्ष केपी शर्मा ओलीले एमाले फेरि सरकारमा जाने दाबी गरेका छन्।
बुधबार काठमाडौंमा सुरू भएको राष्ट्रिय भेलालाई सम्बोधन गर्दै अध्यक्ष ओलीले एमाले संवैधानिक बाटोबाटै पुनः सरकारमा जाने बताएका हुन्।
‘फेरि एमाले सरकारमा जान्छ, कान खोलेर सुने हुन्छ। देश बनाउँछ नेकपा एमालेले,’ उनले भने, ‘संवैधानिक बाटोबाटै सिंहदरबार पस्छौं। जस्केलाबाट होइन। झ्यालबाट होइन। भेन्टिलेटरबाट होइन। मूल ढोकाबाट सिंहदरबार पस्छ।’
उनले एमालेले अघि सारेका विकासका कामलाई फेरि अघि बढाउने र ‘समृद्ध नेपाल, सुखी नेपाली’ को सपना अझ दृढताका साथ देख्ने बताए।
‘विकासका काम जुन एमालेले अगाडि सारेको छ, त्यसलाई फेरि अगाडि बढाउँछ। समृद्ध नेपाल सुखी नेपालको सपना देख्न छाड्दैन। झन् स्पष्ट ढंगले देख्छ, दृढताका साथ देख्छ,’ उनले भने।
ओलीले आफू लगायतका नेताहरूलाई पक्राउ गर्न पनि सरकारलाई चुनौती दिएका छन्।
आफू, नेपाली कांग्रेसका पूर्वसभापति शेरबहादुर देउवा र नेपाली कम्युनिस्ट पार्टी (नेकपा) संयोजक पुष्पकमल दहाल ‘प्रचण्ड’लाई बारम्बार थुन्छु भनिएको प्रति पनि आपत्ति जनाए।
‘केपी ओलीलाई थुन्दिन्छु, शेरबहादुरलाई थुन्दिन्छु, प्रचण्डलाई थुन्दिन्छु। केपी ओली, प्रचण्ड, शेरबहादुर देउवा भनेको मजाकका पात्र हुन् यिनका?’ उनले प्रश्न गरे।
आफूहरू राणा शासन, पञ्चायती व्यवस्था र निरंकुश राजतन्त्रविरुद्ध लडेर आएको भन्दै ओलीले अहिले आएर कसैले थुन्ने धम्की दिनु मजाक भएको बताए।
‘६ महिनाको जागिर खाने सिपाहीले भन्छ फलानालाई थुन्दिन्छु। मजाक ठट्टा गरेको हो? तिमी जन्मिनुभन्दा अगाडि हामी देशका लागि आन्दोलनमा ज्यानको बाजी थापेर हिँडिराख्या छौं। मजाक गर्ने हामीमाथि?’ उनले भने।
ओलीले आफूहरूलाई थुन्ने धम्की दिनेहरूलाई थुनेर देखाउन चुनौतीसमेत दिए।
‘थुने हुन्छ, समातेर। जो आउँछ थुन्दिन्छु, जो आउँछ थुन्दिन्छु। हामी मजाकका पात्र हौं?’ उनले भने।
उनले प्रमाण भेटिएको खण्डमा सत्तारूढ दलका नेताहरू पनि थुनिने बताए।
‘प्रमाण भेटे थुन्दिन्छु अरे। प्रमाण भेटे त उनी पनि थुनिन्छन् होलान् नि। अरू पनि थुनिन्छ होला नि। गृहमन्त्रीको देखिँदैछ। फाइल खोल्दैछु रे, पर्खनुस्, सब थुनिन्छन् रे। कसलाई भनेको? सबै थुनिन्छन् भने उनीहरू को-को बाँकी रहन्छन् त नेपालमा?’ ओलीले भने।
उनले यस्तो गैरजिम्मेवार अभिव्यक्ति दिएर आतंकको राज र मनोवैज्ञानिक आतंक फैलाउन खोजिएको आरोप लगाए।
ओलीले एमाले यस्ता अभिव्यक्तिबाट नहल्लिने बताए। एमाले संघर्षको मैदानबाट आएको पार्टी भएको भन्दै उनले कसैको दया, माया र कृपाबाट नभई जनताको समर्थनबाट सरकारमा पुगेको बताए।
‘एमाले यस्ता हावादारी कुराहरूबाट हल्लिने वाला छैन। एमाले दया, माया र कृपाबाट होइन, संघर्षको मैदानबाट आएर लडेर जितेर आएका हौं। कसैको कृपाबाट होइन, जनताको कृपाबाट सरकारमा आएको हो,’ उनले भने।
उनले एमाले देशको भविष्य, राष्ट्रियताको रक्षक र विकास गर्ने नायक भएको दाबी गर्दै पार्टी सोहीअनुसार अघि बढ्ने बताए।