नेकपा एमालेका प्रचार प्रसार विभाग प्रमुख निरज आचार्यले संविधान र कानुन विपरीत गएर निर्वाचन गर्न नसकिने बताएका छन्।
सेतोपाटीसँग कुराकानी गर्दै आचार्यले स्थानीय तह र प्रदेश तहको निर्वाचन संविधान तथा कानुनले तोकेको समयमै हुनुपर्ने बताए।
उनका अनुसार स्थानीय तहको कार्यकाल जेठमा र प्रदेश तहको कार्यकाल मंसिरमा सकिन्छ। त्यसैले दुवै तहको निर्वाचन एकैपटक गर्न संविधान संशोधन आवश्यक हुन्छ।
‘यो सरकारलाई एकैचोटि निर्वाचन गर्न मन लाग्यो भन्दैमा गर्न मिल्दैन। संविधान र कानुनले स्थानीय तह र प्रदेश तहको चुनाव जतिबेला गर्न भनेको छ, त्यतिबेला मात्रै गर्नुपर्छ,’ उनले भने।
संविधान र कानुन विपरीत निर्वाचनको मिति तोकिए एमालेले स्वीकार नगर्ने उनको भनाइ छ।
‘प्रदेश र स्थानीय तहको निर्वाचन एकैचोटि गर्न संविधान संशोधन गर्न जरूरी छ। के यो सरकार संविधान संशोधन गरेर दुवै निर्वाचन एकैचोटि गराउन तयार छ? यदि त्यो हो भने त्यसपछिको कुरा अलग होला,’ आचार्यले भने।