रसुवागढीमा नेपाल-चीन जोड्ने पक्की पुल बिहीबारदेखि सञ्चालनमा आएको छ।
०७२ सालको भूकम्पले क्षति पुर्याएको पुलमा पुनर्निर्माणपश्चात बिहीबार बिहान १० बजेबाट सवारी साधन चलाउन थालिएको हो।
चीन र नेपाल सरकारबीच भएको सम्झौताअुनसार चिनियाँ अनुदानमा पुलको पुनर्निर्माण गरिएको हो।
१ सय १० मिटर लम्बाई र ९ मिटर चौडाई रहेको पुलको निर्माण कार्य गत वर्ष वैशाखदेखि काम थालिएको थियो।
तिब्बत इन्जिनियरिङ कम्पनी तान् सुन रोड एण्ड ब्रिजले पुल बनाएको हो।
भूकम्पले पुलको नेपालतर्फको आधा भाग भत्काएकाले वारपार गर्न असहज भएपछि बेलीब्रिज राखेर सवारी आउजाउ भइरहेको थियो।
रसुवाका सहायक प्रमुख जिल्ला अधिकारी तथा सूचना अधिकारी देवर्षी सापकोटाले अति आवश्यक भएकाले आजबाट आवतजावत सुरू भए पनि पुल औपचारिक रूपमा नेपाल सरकारलाई हस्तान्तरण नगरिएको बताए।
भूकम्पसँगै सिन्धुपाल्चोकको तातोपानी नाका बन्द भएपछि नेपाल-चीनबीचको व्यापार रसुवागढीबाट हुँदै आएको थियो।
चार वर्षपछि गत जेठ १५ बाट तातोपानी नाका पनि पुन:सञ्चालनमा आएको छ।
