काठमाडौं उपत्यकाका विभिन्न स्थान र समयमा चोरी भएका ६० ओटा दुई पाङ्ग्रे सवारी साधन (मोटरसाइकल र स्कुटर) खोजतलास गरी काठमाडौं उपत्यका ट्राफिक प्रहरी कार्यालयले आज सम्बन्धित धनीलाई हस्तान्तरण गरेको छ।
काठमाडौँ उपत्यका प्रहरी कार्यालयमा आयोजित एक कार्यक्रममा काठमाडौँ उपत्यका प्रहरी कार्यालयका प्रमुख प्रहरी अतिरिक्त महानिरीक्षक (एआइजी) ईश्वर कार्की र काठमाडौँ उपत्यका ट्राफिक प्रहरी कार्यालय प्रमुख प्रहरी वरिष्ठ उपरीक्षक नवराज अधिकारीले संयुक्त रूपमा ३४ ओटा मोटरसाइकल र २६ ओटा स्कुटर धनीलाई हस्तान्तरण गरेका हुन्।
ट्राफिक प्रहरी कार्यालयमा प्राप्त निवेदनका आधारमा खोजी गर्दा केही सवारी साधन वास्तविक नम्बर प्लेटमा र केही नक्कली नम्बर प्लेट प्रयोग गरिएको अवस्थामा काठमाडौँ उपत्यकाका काडाँघारी, पुल्चोक, स्वयम्भू, दरबारमार्ग, चापागाउँ, नेपालटार, टोखा, नयाँबसपार्क, बालकुमारी, भाटभटेनी, भक्तपुर, लोकन्थली, नाला–बनेपा, बसन्तपुर, किर्तिपुर, ताथली, बौद्ध, सिनामंगल, थानकोट, सोह्रखुट्टे, कपन, सुडाल, जरङ्खु लगायतका विभिन्न स्थानबाट फेला पारिएको प्रहरीले जनाएको छ।
आज हस्तान्तरण गरिएका ६० ओटा सहित गत साउनयता ट्राफिक प्रहरीले जम्मा १८१ ओटा दुई पाङ्ग्रे सवारी साधन खोजी गरी धनीलाई जिम्मा लगाइसकेको छ। साथै, चोरीमा संलग्न २५ जना व्यक्तिलाई नियन्त्रणमा लिई १३ ओटा चोरीका सवारी साधनसहित आवश्यक कारबाहीका लागि विभिन्न प्रहरी परिसर तथा वृत्तमा पठाइएको छ।
सवारी साधन फिर्ता पाएपछि धनीहरूले खुशी व्यक्त गर्दै सामूहिक रूपमा ट्राफिक प्रहरीलाई धन्यवाद दिएका छन्।
प्रहरीका अनुसार आर्थिक वर्ष २०८०/०८१ मा ४१७ ओटा र २०८१/०८२ मा ५०३ ओटा दुई पाङ्ग्रे सवारी साधन खोजतलास गरी सम्बन्धित धनीलाई जिम्मा लगाइएको छ।
सवारी साधन चोरी तथा हराउनबाट जोगिन सवारी साधन सुरक्षित स्थानमा पार्किङ गर्न, ह्वील लक, चेन लक, ह्यान्डिल लक, डिस्क लक तथा सुरक्षा साइरन जडान गर्न र मानिसको आवत–जावत नहुने एकान्त स्थानमा पार्किङ नगर्न काठमाडौँ उपत्यका ट्राफिक प्रहरी कार्यालयका प्रवक्ता एवम् प्रहरी उपरीक्षक नरेशराज सुवेदीले अनुरोध गरेका छन्।
-1756794700.JPG)
-1746009348.jpg)
