नेपाल चिकित्सक संघ (एनएमए) को निर्वाचनका लागि नियमअनुसार उमेदवारी दर्ता गरे पनि हटाइएको भन्दै डा. अरूण शाही अदालत जाने भएका छन्।
एनएमए निर्वाचन नियमावली २०७० अनुसार वारेसनामा मार्फत् उम्मेदवारी दर्ता गराएको र सो उम्मेदवारी प्रारम्भिक उम्मेदवार नामावलीमा स्वीकार भइसकेको भए पनि अन्यायपूर्ण ढंगले नाम हटाइएको डा.शाहीको भनाइ छ।
माघमा हुने एनएमएको निर्वाचनका लागि शाहीले उपाध्यक्ष (बागमती प्रदेश संयोजक) पदमा उमेदावारी दिएका थिए।
निर्वाचन कार्यतालिका सार्वजनिक भइसकेपछि मनोनयनको मितिमा बेलायतमा आयोजना हुने ‘ईस्मो इम्युनो–अन्कोलोजी २०२५’ सम्मेलनमा सहभागी हुन जाने तय भइसकेकोले आफूले निर्वाचन नियमावलीको प्रावधानअनुसार मंसीर २३ गते डा. विपिन पौडेलका नाममा वारेसनामा दिई उम्मेदवारी दर्ता गराइएको उनले बताए।
आफ्नो उम्मेदवारी कायम गर्न माग राख्दै शाहीले एनएमएको निर्वाचन समितिमा निवेदन दर्ता गराएका थिए भने जिल्ला प्रशासन कार्यालय काठमाडौंमा समेत उजुरी दिएका थिए।
जिल्ला प्रशासन कार्यालयल काठमाडैले शाहीको उमेदवारी कायम राख्न निर्देशन दिए पनि एनएमए निर्वाचन आयोगले त्यसलाई अस्वीकार गर्दै शाहीको नाम हटाएर उमेदवारहरूको नामावाली सार्वजनिक गरिसकेको छ।
निर्वाचन आयोगले मनोमानी गरेको भन्दै शाहीले आफू अदालत जाने बताए। आइतबार उच्च अदालत पाटनमा रिट दायर गर्ने तयारी गरेको उनको भनाइ छ।
'नेपाल चिकित्सक संघको निर्वाचन नियमावलीको परिच्छेद ४ को नियम १ अनुसार संघका सदस्यले प्रतिनिधि वा प्रस्तावक–समर्थकमार्फत मनोनयन दर्ता गर्न पाउने व्यवस्था छ। निर्वाचन कार्यतालिका सार्वजनिक गर्दा पनि यही व्यवस्था अनुसार मनोनयन दर्ता गर्न सकिने गरी सूचना जारी गरिएको थियो,’ डा.शाहीले भने, 'निर्वाचन आयोगले मलाई छलफलमा समेत नबोलाइकन मेरो उमेदवारी खारेज गरेको छ। एनएमए जस्तो विशुद्ध व्यवसायिक संस्थामा यो तहको पूर्वाग्रह सहन सकिँदैन।म अदालत जादैछु।'
पुस २ गते मनोनयन दर्ता गर्ने तालिका पहिल्यै सार्वजनिक भइसकेको भए पनि आफूलाई लक्षित गरेर मंसिर २८ गते निर्वाचन समितिले नयाँ व्यवस्था थप्दै वारेसनामामा नोटरी अनिवार्य हुने सूचना जारी गरेको उनको आरोप छ।
-1756794700.JPG)
-1746009348.jpg)
