अब निजी अस्पतालले २० प्रतिशत बेड कोभिड व्यवस्थापनको लागि छुट्याउनु पर्ने भएको छ।
कोरोना संक्रमितको संख्या बढ्दै गएको भन्दै स्वास्थ्य तथा जनसंख्या मन्त्रालयले निजी अस्पतालका २० प्रतिशत बेड कोभिड व्यवस्थापनको लागि छुट्याउन भनेको हो।
शुक्रबार मन्त्रालयको स्वास्थ्य आपतकालीन कार्यसञ्चालन केन्द्रले विज्ञप्ति जारी गर्दै कोरोना संक्रमित बढ्दै जाँदा अस्पतालका बेड अभाव भएको भन्दै निजी क्षेत्रका अस्पताललाई २० प्रतिशत बेड छुट्याउन भनेको हो।
'काठमाडौं उपत्यका लगायतका ठाउँहरूमा अस्पतालका बेड अभाव हुँदै गएको छ। त्यसैले मन्त्रालयले निजी क्षेत्रका अस्पताहरूमा समेत २० प्रतिशत बेडहरू कोभिड व्यवस्थापनको लागि राख्नुहुन सबैलाई अपिल गरिएको हो,'विज्ञप्तीमा भनिएको छ।
यसअघि कुनै अस्पतालमा भर्ना भएका बिरामीमा कोरोना पोजिटिभ देखिएमा कोभिड अस्पतालमा ‘रिफर’ गरिन्थ्यो। तर अहिले कोभिड अस्पतालहरूमा राख्न समस्या भएको भन्दै संक्रमण देखिएमा कोभिड अस्पतालसँग समन्वय गरी सोही अस्पतालमा उपचार गराउन अनुरोध गरेको हो।
साथै, उपत्यकाभित्रका कुनै अस्पतालहरूमा पठाउनु पर्ने अवस्था भएमा हब अस्पतालको समन्वयमा मन्त्रालयबाट निर्देशन लिएरमात्रै गर्न अनुरोध गरेको छ।
