सुरक्षण मुद्रण केन्द्रका तत्कालीन कार्यकारी निर्देशक विकल पौडेल दोस्रो मुद्दामा पनि भ्रष्टाचारी ठहर भएका छन्।
विशेष अदालतका न्यायाधीशहरू अध्यक्ष टेकनारायण कुँवर, सदस्य रामबहादुर थापा र रितेन्द्र थापाको संयुक्त इजलासले उनलाई भ्रष्टाचारी ठहर गरेको हो।
पौडेलले झुटा विवरण पेस गरी सार्वजनिक नियुक्ति लिएको भन्दै अख्तियार दुरूपयोग अनुसन्धान आयोगले गत वैशाख ९ गते उनीविरूद्ध मुद्दा दायर गरेको थियो।
पौडेलले अमेरिकाको स्थायी बसोबास अनुमति पत्र लिएको आरोप थियो।
अदालतको आदेश अनुसार यस मुद्दामा उनलाई १२ महिना कैद र १० हजार रूपैयाँ जरिवाना तिराउन भनिएको छ।
भ्रष्टाचार निवारण ऐन २०५९ को दफा १६ को उपदफा १ बमोजिमको कसुरजन्य कार्य गरेको ६ महिना कैद र १० हजार जरिवाना हुने भनिएको छ। साथै सार्वजनिक संस्थाको प्रमुख कार्यकारी पदमा कार्यरत रहेका उनलाई उक्त ऐनको दफा २४ बमोजिम थप ६ महिना कैद सजाय हुने भनिएको छ।
पौडेलले आफूसँग अमेरिकाको पिआर भएको जानीजानी सार्वजनिक पद धारण गरेको फैसला अदालतले सुनाएको हो।
यसअघि विशेष अदालतले पौडेललाई अर्को मुद्दामा पनि भ्रष्टाचारी ठहर गरिसकेको छ।
कार्यकारी पदमा हुँदा उनले गुणस्तरहीन इलेक्ट्रिक ट्रान्सफर्मर राख्ने गरेको र सम्झौताको सर्त विपरीत तोकिएको कन्ट्री अफ ओरिजिनबाट जेनेरेटर खरिद नगरी फरक मुलुकमा बनेको जेनेरेटर गरी भुक्तानी लिएर भ्रष्टाचार गरेको आरोप थियो।
गत वर्ष वैशाख ३ गते अख्तियारले अदालतमा मुद्दा दायर गरेको थियो।
जेठ ८ गते अदालतले उनीसहित चार जनालाई भ्रष्टाचारी ठहर गरेको थियो। पौडेललाई अदालतले दुई वर्ष कैद र दामासाहीले हुन आउने बिगो २५ करोड ४७ लाख १ हजार ६८ रूपैयाँ जरिवाना भराउन आदेश दिएको थियो।
त्यसैगरी हालै अख्तियारले पौडेलविरूद्ध अर्को मुद्दा पनि दायर गरेको छ। त्यो मुद्दा विशेष अदालतमा विचाराधीन छ।
अख्तियारले पौडेलविरूद्ध गैरकानुनी सम्पत्ति आर्जन गरी भ्रष्टाचार गरेको भन्दै जेठ ९ गते अर्को मुद्दा दायर गरेको थियो।
पौडेल २०७४ सालदेखि २०८० सालसम्म केन्द्रको कार्यकारी निर्देशक भएका थिए। उनले केन्द्रको कार्यकारी निर्देशक भइरहेकै बेला आफ्नो परिचय लुकाएर कमिसन एजेन्टका रूपमा समेत सम्पत्ति आर्जन गरेको भेटिएको अख्तियारले जनाएको छ।
पौडेलको अमेरिकास्थित बैंक अफ अमेरिकामा २८ करोड ९५ लााख ७५ हजार ६८९ रूपैयाँ जम्मा गरेको भेटिएको अख्तियारले जनाएको छ। त्यस्तै सिंगापुरको बानकोटेक कम्पनीबाट कमिसनवापत् ९ लाख ९ हजार ४४१ डलर लिएको र अर्को एक कम्पनी इन्स्टासेफ इन्कर्पोरेसनबाट बिक्रीवापत् १ लाख ३९ हजार ९४६ अमेरिकी डलर प्राप्त गरेको जनाएको छ।
उनले सिंगापुरस्थित प्रुडियन्सल इन्स्योरेन्समा २ करोड ४४ लाख ६३ हजार ८२२ बराबरको जीवन बीमा गरेको समेत भेटिएको थियो।
अख्तियारले उनको आर्जन ६४ करोड २० लाख ६२ हजार ५७२ रूपैयाँको हिसाब निकालेको हो। उनको आर्जनको २ करोड १ लाख ४३ हजार आठ सय रूपैयाँको मात्र हिसाब भेटिएको र ६२ करोड १९ लाख १८ हजार ६ सय ८४ रूपैयाँको स्रोत नखुलेको जनाएको थियो।
अख्तियारले विशेष अदालतमा उनलाई भ्रष्टाचार निवारण ऐनको दफा २० बमोजिम बिगोअनुसार कैद र बिगो बमोजिम जरिवानाको सजाय गरी जम्मा बिगो ६२ करोड १९ लाख १८ हजार ६ सय ८४ रूपैयाँ जफत र असुल उपर गर्न माग गरेको थियो।
सम्बन्धित समाचारः विकल पौडेलले अवैध रूपमा ६२ करोड सम्पत्ति आर्जन गरेको भन्दै अख्तियारले दायर गर्यो मुद्दा
विकल पौडेलविरूद्ध अख्तियारले हाल्यो अर्को भ्रष्टाचार मुद्दा
