प्रहरीले बुधबार साँझ धनकुटामा बारले घेरेर राखिएको ८ वर्षीय एक बालकको उद्धार गरेको छ।
छथरजोरपाटी गाउँपालिका वडा-५ परेवादिनस्थित गोठमा राख्दै आएको सुहाङ लिम्बूलाई प्रहरीले उद्धार गरेको हो।
उनलाई दुई महिनादेखि बाँसको टाटीले बारेर बनाइएको गोठमा बालकलाई राख्ने गरेको सूचना प्राप्त भएपछि उद्धार गरिएको जिल्ला प्रहरी कार्यालय धनकुटाका डिएसपी ओमप्रकाश खनालले जानकारी दिए।
'हामीले बाँसले बारेर बनाइएको गोठजस्तो संरचना भत्काइदिएका छौं,' उनले भने, 'बालकको मानसिक सन्तुलन ठीक नभएको भन्दै थुनेको पाइएको छ।'
तेह्रथुम फेदाप गाउँपालिका वडा-१ घर भएका सोमकुमार लिम्बू परिवारसहित ससुरालीमा बस्दै आएका छन्।
एक वर्षदेखि धनकुटामा बस्दै आएका दम्पतीका सुहाङ एक्ला छोरा हुन्। आर्थिक अवस्था न्यून भएका परिवारले छोरालाई एकजनाले छोड्ने नमिल्ने भएपछि गोठ बनाएको प्रहरीलाई बताएका छन्।
दम्पतीले प्रहरीलाई बताएअनुसार पहिलादेखि नै सुहाङ चकचके, हरेक कुरा सुँघ्ने, सडकमा दौडिरहने गर्थे। जसले गर्दा एकजनाले उनलाई हेरिरहनुपर्थ्यो।
उमेर बढ्दै जाँदा पनि छोराको व्यवहारमा केही परिवर्तन नआएपछि स्कुल समेत नपठाएको दम्पतीले प्रहरीलाई जानकारी दिए।
'हामीले धेरै धामी झाक्री गर्यौं,' दम्पतीले प्रहरीलाई भनेका छन्, 'जति गर्दा पनि निको भएन।'
उनीहरूले छोरालाई अस्पताल भन्दा पनि धामी-झाक्री र मठमन्दिरमा पुर्याएरको दाबी गर्छन्।
मानसिक रूपमा केही समस्या भएको जनचेतना नै नभएकाले पनि उनलाई गोठमा थुनेर राख्ने गरेको बताएका छन्।
उनीहरूले बिहान खाना खाएर आफू काममा जाने बेलामा गोठमा राखेर जाने र साँझ फर्किएर घरधन्दा सक्काएपछि उनलाई घरमा सुताउने गरेको प्रहरी अनुसन्धानमा खुलेको छ।
'छोरालाई बचाउनका लागि गोठमा थुनेका हौं,' दम्पतीले प्रहरीलाई भनेका छन्, 'छोरा हेरेर बस्दा दुई छाक खान धौ-धौ हुन्छ। काममा जानैपर्यो।'
छोरालाई एक्लै छोड्दा कहाँ पुग्ने टुङ्गै नहुने वा छोरा हराउने डराले बारले बारेर त्यहाँ सुरक्षित रूपमा राखेको दम्पतीले प्रहरीलाई बताएका छन्।
उनीहरूलाई आफ्नो छोराको मानसिक तथा शारिरिक अवस्था कस्तो छ भनेर थाहा नभएको देखियो। केही ज्ञान नभएको र कसैले पनि जानकारी नगराएका आफूहरूले छोरालाई गोठमा थुनेको बताएका छन्।
बुधबार बालकको उद्धार गरेसँगै दम्पतीलाई काउन्सिलिङ गरिएको छ। उनीहरूले आफ्नो छोरालाई उपचारका लागि काठमाडौं लैजाने बताएका छन्। तर कानुनी कागजात केही नभएकाले बिहीबार तेह्रथुम पठाइएको डिएसपी खनालले जानकारी दिए।
'हामीले उद्धार गरेसँगै विभिन्न संघसस्थाले उपचारका लागि सहयोग गर्ने बताएका छन्। त्यसैले कागजात बनाउन पठाएका हौं,' डिएसपी खनालले भने।
उनीहरूलाई छोरामाथि अमानवीय व्यवहार गरिरहेको भन्नेसमेत ज्ञान थिएन्। त्यसैले प्रहरीले काउन्सिलिङ गरेर छोडिदिएको छ। पुन: त्यस्तै घटना दोहोरिएमा मात्र कानुनी कारवाही अगाडि बढाउने उनले सेतोपाटीलाई जानकारी दिए।
-1746009348.jpg)
