ललितपुरमा खाजाघरमा पसेका युवकको कुर्सीमै ज्यान गएको छ।
ललितपुर महानगरपालिका-१४ स्थित नखिपोटमा खाजाघरमा पसेका युवक कुर्सीमा मृत फेला परेको जिल्ला प्रहरी परिसर ललितपुरका एसपी चक्रराज जोशीले जानकारी दिए।
बुधबार दिउँसो खाजाघरमा काभ्रे महाभारत गाउँपालिका-५ घर भई लोहाचोक बस्दै आएका २३ वर्षीय टुकेस मगर मृत फेला परेका हुन्।
उनका दाइले चलाउने गाडीमा उनी सहचालकको रूपमा काम गर्थ।
दिलबहादुर आलेमगरले सञ्चालन गरेको खाजा घर प्रवेश गरी उनी कुर्सीमा बसेका थिए। आलेमगर पनि उनका आफन्त नै रहेको एसपी जोशीले बताए।
मृतक टुकेस अत्यधिक मदिरा सेवन गर्थे। त्यसदिन पनि उनले मदिरा सेवन गरेको प्रहरीले बताएको छ।
‘उनी अत्यधिक मदिरा सेवन गर्ने रहेछन्। खाने कुरा केही नखाएको र मदिरा मात्रै सेवन गरेको अवस्था थियो,’ एसपी जोशीले भने, ‘कुर्सीमै ज्यान गएपछि सञ्चालकले प्रहरीलाई खबर गरेको हो।’
उनका अनुसार अहिलेसम्म घटना शंकास्पद छैन। उनको शरीरमा चोटपटक पनि देखिएको छैन।
शव पोष्टमर्टमको लागि पाटन अस्पताल लगिएको थियो। पोष्टमर्टम सकेर परिवारले शव बुझिसकेका छन्। यद्यपि रिपोर्ट आउन भने बाँकी रहेको प्रहरीले जनाएको छ।
