काठमाडौंको नक्सालस्थित भाटभटेनी सुपरमार्केट भत्काउने क्रममा दुई जना घाइते भएका छन्।
भदौ २४ गते भएको आगजनीपछि भग्नावशेष रहेको भवन भत्काउने क्रममा लागेर आज दुई जना घाइते भएको जिल्ला प्रहरी परिसर काठमाडौंका एसपी पवनकुमार भट्टराईले जानकारी दिए।
उनका अनुसार अपराह्न ३:४० बजे भवनका अंश झरेर उनीहरूलाई लागेको थियो।
घाइते हुनेमा हेटौंडाका ३३ वर्षीय राजकुमार स्याङ्तान र दीपक तामाङ छन्। त्यस्तै एक जनाको भने अझै उद्धार हुन बाँकी छ। स्याङ्तानको टाउको र खुट्टामा गम्भीर चोट लागेको छ। तामाङको भने हात र खुट्टामा चोट छ।
‘दुई जना घाइतेलाई उद्धार गरी त्रिवि शिक्षण अस्पताल पठाएका छौं। अर्का एक जनाको आवाज आएको छ। कहाँ हुनुहुन्छ भन्ने पनि देखिएको छ, हामी उद्धार गर्दैछौं,’ उनले भने।
टिचिङ अस्पतालका व्यवस्थापन अधिकृत सागर पौडेलले दुई जना घाइतेलाई अस्पताल ल्याइएको र उपचार भइरहेको बताए।
‘दुई जना घाइते ल्याइएको छ, उपचार भइरहेको छ,’ उनले भने।
-1746009348.jpg)
