प्रहरी वृत्त महाराजगन्जमा प्रहरीको हत्यामा संलग्न भएको आरोपमा प्रहरीले थप एक जनालाई पक्राउ गरेको छ।
थप एक जनालाई पक्राउ गरी अनुसन्धान अघि बढाएको जिल्ला प्रहरी परिसर काठमाडौंका एसपी पवनकुमार भट्टराईले जानकारी दिए।
पक्राउ पर्नेमा भोजपुरका इन्द्रबहादुर राई छन्। उनलाई शनिबार प्रहरीले सामाखुसी क्षेत्रबाट पक्राउ गरेको हो। भदौ २४ गते राई अन्य आपराधिक घटनामा पनि संलग्न भएको आरोप छ। त्यसबारे प्रहरीले अनुसन्धान अघि बढाएको छ।
योसँगै प्रहरीको हत्यामा संलग्न आरोपमा पक्राउ पर्नेको संख्या १३ पुगेको छ। जसमध्ये सात जना पुर्पक्षका लागि थुनामा छन्।
भदौ २४ गते महाराजगन्जका प्रहरी सहायक निरीक्षक (असई) मिलन राय, प्रहरी जवान उत्तम थापा र कोटेश्वरका सहायक हवल्दार अमृत गुरूङको हत्या भएको थियो।
-1746009348.jpg)
