नेपाल प्रहरीका ३३ औं आइजिपीमा नियुक्त भएका दानबहादुर कार्कीले लेखेको नयाँ गीत रेकर्डिङ हुने भएको छ।
सोमबार बसेको मन्त्रिपरिषदको बैठकले आइजिपीको पदमा कार्कीलाई नियुक्त गरेको हो।
नेपाल प्रहरीको कमाण्ड सम्हाल्ने जिम्मेवारी पाएका उनी गीतकार समेत हुन्। उनले लेखेका गीतहरू चर्चित समेत छन्।
जेनजी आन्दोलनपछि एआइजी कार्कीलाई भदौ २४ गते काठमाडौं उपत्यका प्रहरी कार्यालय रानीपोखरीको जिम्मेवारी दिइएको थियो। त्यसदिन प्रहरीका कार्यालय तथा भवनहरूमा समेत आगजनी गरिएको थियो। तीन जना प्रहरीको हत्या समेत भएको घटनाले प्रहरीको मनोबल समेत घटेको छ।
त्यसै सन्दर्भमा कार्कीले ‘खरानीबाट उठेर म फेरि आएँ आमा’ बोलको गीत लेखिसकेको संगीत निर्देशक सरोज ओलीले जानकारी दिए।
‘उहाँले एउटा नयाँ गीत लेख्नुभएको छ। खरानीबाट उठेर म फेरि आएँ आमा बोलको गीत हो। उहाँले पछिल्लो अवस्थापछि प्रहरीको मनोबल उठाउनका लागि यो गीत लेख्नुभएको हो,’ ओलीले भने, ‘प्रत्येक प्रहरीलाई हौसला दिनका हामी फेरि उठेका छौं भन्ने तरिकाले उहाँले लेख्नुभएको छ।’
यस गीतमा नेपाल प्रहरीलाई सर्वसाधारणको पनि हातेमालो चाहिने भनेर उल्लेख गरेको उनले बताए।
यस गीतमा दीपक शर्माले संगीत भरेका छन्। थानेश्वर गौतमले स्वर दिने तयारी छ।
संगीत निर्देशक सरोज ओलीका अनुसार बिहीबार यो गीतको रेकर्डिङ हुँदैछ। त्यस्तै महिला गायकको पनि स्वर चाहिने भएकाले आज-भोलिमै गायकको टुंगो लाग्ने उनले बताए।
कार्की विद्यालय-कलेज पढ्दा नै गीत लेख्थे। उनी चाडपर्व लक्षित, राष्ट्रिय भाव झल्किने, बाल गीत लेख्ने गर्छन्।
उनले प्रहरीकै ‘हर गाउँ हर नगरी, फुलको बास्ना सरी’ गीत पनि लेखेका छन्।
केही समयअघि ओलीले नै निर्देशन गरेको सिनेमा हरिबहादुरको जुत्ताका लागि गीत चाहिएको थियो। त्यतिबेला उनले कार्कीलाई सम्पर्क गरेका थिए।
भेटेपछि कार्कीले डायरी निकालेर दिए।
‘गीत चाहिएको थियो। उहाँलाई भेट्न जाँदा कुनै छानेर बनाउनु भनेर डायरी नै देखाउनुभयो,’ ओलीले भने, ‘त्यसमा ढाका टोपी शिरैमा भन्ने रैछ। त्यो गीत करिब ४० लाखले हेरेका छन्।’
आँखा झिमझिम भो, ए जेठी आमा, नाच्न पनि आउँछ मलाई लगायतका गीत पनि उनले लेखेका छन्।
यसरी गीतकारको रूपमा चर्चा कमाएका कार्की प्रहरी सेवामा आउनुअघि पनि गीत लेखेका थिए। तर त्यतिबेला गीतहरू पत्रिकामा प्रकाशित हुने गरे पनि उनको नाम भने उल्लेख भएका थिएनन्।
गुल्मीको मालिका गाउँपालिका घमिरमा २०२९ साउन १५ गते कार्की जन्मेका हुन्।
उनले २०५४ चैत १८ गते प्रहरी निरीक्षकबाट सेवामा प्रवेश गरेका थिए।
प्रहरी निरीक्षकबाट प्रहरी नायब उपरीक्षकमा २०६६ मंसिर २६ पदोन्नति भएका थिए।
त्यस्तै, २०७४ साउन १९ गते डिएसपीबाट एसपीमा बढुवा भएका थिए।
एसपीबाट २०७९ साउन ३ गते उनी एसएसपीमा बढुवा भएका हुन्।
एसएसपी हुँदा उनले जिल्ला प्रहरी परिसर काठमाडौंका प्रमुख भएका थिए। त्यतिबेला नक्कली भुटानी शरणार्थी प्रकरणको अनुसन्धान समेत भएको थियो।
उनकै कार्यकालमा अनुसन्धान भई मुद्दा दर्ता भएको थियो। त्यही बेला काठमाडौं उपत्यका अपराध अनुसन्धान कार्यालयमा एसएसपी मनोज केसी थिए। कार्यालयमा रोकिएको भुटानी शरणार्थीको फाइल तत्कालीन समयमा केसीले खोलेपछि अनुसन्धान सुरू भएको थियो।
त्यसपछि २०८१ जेठ १३ गते कार्की डिआइजीमा बढुवा भएका थिए। डिआइजीमा बढुवा भएपछि कार्कीलाई महानिरीक्षकको सचिवालयमा राखिएको थियो। उनी केन्द्रीय प्रवक्ता समेत भएका थिए।
त्यस्तै उनी २०८२ वैशाख ११ गते एआइजीमा बढुवा भएका थिए। उनी एसएसपीदेखि पहिलो वरीयतामा बढुवा भएका अधिकृत हुन्।
कार्कीले मानविकी तथा समाजशास्त्र, शिक्षा शास्त्र र कानून संकाय विषयमा स्नातक तह अध्ययन गरेका छन्।
त्यस्तै राजनीति शास्त्रमा उनले स्नातकोत्तर गरेका हुन्।
उनी युएन मिसनका लागि पूर्वी टिमोरमा दुई पटक गरी तीन वर्ष र हाइटीमा एक पटक गरी १८ महिना बसेका छन्।
टिमोरमा बस्दा उनले संयुक्त राष्ट्र संघ पद पाएका छन्। त्यस्तै तीन पटक प्रशंसापत्र प्राप्त गरेका थिए।
नेपाल सरकारले उनलाई प्रबल जनसेवा श्री पदकबाट पनि पुरस्कृत गरेको छ।
नेपाल प्रहरीले १४ पटक अभिलेखमा जनिने गर नगद पुरस्कार पनि दिएको छ।
-1746009348.jpg)
