मदन भण्डारी लोकमार्गअन्तर्गत मकवानपुरको बकैया गाउँपालिका–३ हात्तिसुडेमा मंगलबार साँझ मोटरसाइकको ठक्करबाट पैदयात्री एक वृद्धको मृत्यु भएको छ भने दुई जना घाइते भएका छन्।
हेटौंडाबाट फापरबारीतर्फ आउँदै गरेको बा ५८ प ३३१८ नम्बरको मोटरसाइकलले ठक्कर दिँदा पैदलयात्री स्थानीय ७१ वर्षीय खडकबहादुर घलानको मृत्यु भएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक पुष्कर बोगटीले जानकारी दिए।
मोटरसाइकलको ठक्करबाट गम्भीर घाइते घलानलाई उपचारका लागि हेटौंडा अस्पतालमा भर्ना गरिएको थियो। उनको उपचारका क्रममा मृत्यु भएको प्रहरीले जनाएको छ।
मोटरसाइकल चालक मकवानपुरको बकैया गाउँपालिका–७ निवासी २५ वर्षीय देवराज विक र मोटरसाइकलमा पछाडि सवार मकवानपुरको बागमती गाउँपालिका–६ का २० वर्षीय देवराज धानुकी घाइते भएका छन। उनीहरू दुवै जनाको स्थानीय हात्तिसुडे मेडिकलमा उपचार भइरहेको प्रहरीले जनाएको छ।
यसैबीच नाबालिकालाई करणी गरेको आरोपमा मकवानपुर प्रहरीले एक युवकलाई आज पक्राउ गरेको छ ।
पीडित पक्षको जाहेरी दरखास्तको आधारमा हेटौंडा उपमहानगरपालिका–१ निवासी ४६ वर्षीय ऋषि केबीलाई पक्राउ गरिएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक पुष्कर बोगटीले जानकारी दिए।
पक्राउ परेका युवकमाथि जबरजस्ती करणीसम्बन्धी मुद्दामा जिल्ला अदालत मकवानपुरबाट म्याद थप गरी अनुसन्धान अघि बढाइएको प्रहरी नायब उपरीक्षक बोगटीले बताए।
-1746009348.jpg)
