अमेरिकाको संघीय अदालतले सन् २०१९ मा इथियोपियामा भएको ७३७ म्याक्स जेट दुर्घटनामा मारिएका संयुक्त राष्ट्रसंघका एक वातावरण कर्मचारीको परिवारलाई दुई करोड ८० लाख डलरभन्दा बढी क्षतिपूर्ति तिर्न बोइङलाई आदेश दिएको छ।
सिकागोमा रहेको संघीय अदालतको जुरीले बुधबार सुनाएको यो फैसलाले सो दुर्घटनामा मारिएकी शिखा गर्गको परिवारलाई क्षतिपूर्ति दिएको हो।
रोयटर्स समाचार संस्थाका अनुसार, बोइङ र गर्ग परिवारबीच बुधबार नै भएको सम्झौता अनुसार क्षतिपूर्ति रकम र २६ प्रतिशत ब्याज सहित बोइङले कुल तीन करोड ५८ लाख ५० हजार डलर दिने भएको छ। बोइङले सो फैसलामा पुनरावेदन गर्ने छैन।
सो दुर्घटना र सन् २०१८ मा इन्डोनेसियामा भएको सोही मोडेलको अर्को विमान दुर्घटनामा गरेर कुल ३४६ जनाको मृत्यु भएको थियो। ती दुई वटै दुर्घटनामा परेकाका परिवारले दर्जनौं मुद्दाहरू दायर गरेका छन्। तीमध्ये गर्गका परिवारले दिएका मुद्दामा यो पहिलो फैसला आएको हो।
गर्ग त्यतिबेला ३२ वर्षकी थिइन्। उनको परिवारले ७३७ म्याक्स विमान त्रुटिपूर्ण रूपमा डिजाइन गरिएको र बोइङले यात्रुहरू र सर्वसाधारणलाई यसको खतराहरूबारे चेतावनी दिन असफल भएको आरोप लगाएका थिए। दुवै दुर्घटनामा एक स्वचालित उडान नियन्त्रण प्रणालीको भूमिका रहेको थियो।
सो फैसलापछि अमेरिकी विमान निर्माताले एक विज्ञप्ति निकाल्दै दुवै दुर्घटनामा आफ्ना प्रियजन गुमाएका सबैप्रति गहिरो दुःख व्यक्त गरेको छ।
बोइङले अधिकांश दाबीहरू मिलापत्र मार्फत समाधान भइसकेको भए पनि परिवारहरूलाई अदालतमा क्षतिपूर्तिको मुद्दा चलाउने अधिकार रहेको र बोइङले यसको सम्मान गर्छ भनेको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
