अमेरिकी पूर्वराष्ट्रपति जेएफ केनेडीकी नातिनी टाटियाना स्लोसबर्गले आफूलाई क्यान्सर भएको सार्वजनिक गरेकी छन्।
द न्यूयोर्करमा आर्टिकल लेखेर ३५ वर्षीया स्लोसबर्गले आफूलाई टर्मिनल क्यान्सर भएको र चिकित्सकले एक वर्षभन्दा कम बढी बाँच्न नसक्ने भनेको खुलासा गरेकी हुन्।
स्लोसबर्गका अनुसार उनीलाई गत वर्ष एक्यूट मायलोइड ल्युकेमिया (एएमएल) को दुर्लभ रूप इन्भर्सन-३ भएको पत्ता लागेको थियो।
इन्भर्सन-३ एएमएलका २ प्रतिशतभन्दा कम बिरामीहरूमा देखिने भनेर उनले बताएकी छन्।
अमेरिकी टेलिभिजन नेटवर्क सिएनएनका अनुसार स्लोसबर्गले २०२४ को मे महिनामा छोरी जन्माएपछि उनलाई यो रोग पत्ता लागेको थियो।
'मैले विश्वासै गर्न सकिन। छोरीलाई जन्म दिनुअघि मात्रै नौ महिनाको गर्भमा मैले एक माइल पौडी खेलेकी थिएँ। म एकदम स्वस्थ थिएँ,' उनले भनेकी छन्।
स्लोसबर्गले उपचारका कठिन चरणहरूबारे पनि उल्लेख गरेकी छन्।
यसबीच कयौं चरणको किमोथेरापी, दुई पटक बोन–म्यारो प्रत्यारोपण, र दुईवटा क्लिनिकल ट्रायल भएको उनले बताइन् ।
सेप्टेम्बरमा उनी ‘एप्स्टिन–बार भाइरस’ बाट पनि संक्रमित भइन्, जसले उनका मिर्गौलामा गम्भीर असर गर्यो। दीर्घ उपचारपछि उनलाई फेरि हिँड्न सिक्नुपरेको थियो।
'अन्तिम क्लिनिकल ट्रायलको क्रममा मेरो चिकित्सकले एक वर्षजति बाँच्न सक्छौ भनेका छन्,' स्लोसबर्गले भनेकी छन्।
स्लोसबर्ग पर्यावरण पत्रकारका रूपमा सक्रिय थिइन्। उनी पूर्वराजदूत क्यारोलिन केनेडी र डिजाइनर एडविन स्लोसबर्गकी छोरी हुन्।
उनका पति जर्ज मोरानसँग उनका ३ वर्षको छोरा र १ वर्षकी छोरी छन्।
केनेडी परिवार दशकौँदेखि राजनीतिक तथा व्यक्तिगत त्रासदीसँग जुध्दै आएको छ।
सन् १९६३ मा जोन एफ. केनेडी र १९६८ मा रोबर्ट एफ. केनेडीको हत्या भएको थियो।
'मैले सधैं राम्रो छोरी, राम्रो दिदी बन्न खोजेँ। तर अब म आमाको जीवनमा नयाँ पीडा थपेर बसेकी छु, र यसलाई रोक्न म केही गर्न सक्दिनँ,' लेखमा स्लोसबर्गले भनेकी छन्।
-1746009348.jpg)
