अध्यागमन विभागले विदेशी विद्यार्थीहरू पठनपाठन बाहेक अन्य गतिविधिमा संलग्न भएको थाहा पाए सूचना दिन अनुरोध गरेको छ।
बुधबार विभागका निर्देशक एवं प्रवक्ता टीकाराम ढकालले एक विज्ञप्ति जारी गरी विदेशी विद्यार्थीहरू गैरकानुनी काममा समेत संलग्न देखिएको भन्दै यस्ता गतिविधिमा संलग्नबारे सूचना दिन अनुरोध गरेका हुन्।
‘भिसा तथा आम्दानी प्रयोजनका लागि मात्र आफ्नो शैक्षिक संस्थामा विदेशी विद्यार्थी भर्ना नगर्न, आफ्नो संस्थामा अध्ययनरत विद्यार्थीहरू नियमित रूपन पठनपाठनमा संलग्न भए/नभएको यकिन गरी मात्र भिसा सिफारिस गर्न र पठनपाठन भन्दा बाहेक अन्य शंकास्पद गतिविधिमा संलग्न भएको जानकारीमा आएमा तत्काल अध्यागमन विभाग वा स्थानीय प्रशासनलाई सूचना दिन सबै शैक्षिक संस्थाहरूलाई अनुरोध गर्दछ,’
कतिपय शैक्षिक संस्थाहरूले अध्ययन कार्यमा नियमित रूपमा संलग्न नहुने थाहा पाए पनि आम्दानीको दृष्टिकोणले विद्यार्थी भर्ना गर्ने गरेको पनि विज्ञप्तिमा उल्लेख छ।
यसरी विदेशी नागरिकहरू लामो अवधिसम्म नेपाल बस्नका लागि अध्ययन भिसा लिने र गैरकानुनी काममा संलग्नहरूका लागि पनि भिसा सिफारिस हुने गरेको विभागले जनाएको छ।
यस्ता गतिविधिबारे शैक्षिक संस्थालाई जानकारी भए पनि विभागलाई जानकारी नदिएको विज्ञप्तिमा भनिएको छ।
‘अध्ययन भिसा प्राप्त गरेका केही विदेशी नागरिकहरुले नियमित रुपमा कक्षामा सहभागी नभएको, अध्ययन भिसाको अवधि थप गर्न नक्कली कागजात पेस गरेको, अध्ययनको कोर्ष पूरा भएपछि शैक्षिक प्रमाणपत्र समेत पेस गर्न नसकेको कतिपय विदेशी विद्यार्थीहरू गैरकानूनी कार्यमा संलग्न रहेको देखिँदा समेत सम्बन्धित शैक्षिक संस्थाहरूले विभाग तथा स्थानीय प्रशासनलाई सूचना दिने गरेको पनि पाइएन,’ विभागले भनेको छ।
विदेशी नागरिकहरूलाई अध्ययन गराउने सबै शैक्षिक संस्थाहरूको नियमित अनुगमन गर्न शिक्षा, विज्ञान तथा प्रविधि मन्त्रालय र विदेश नागरिकहरूको गतिविधिको अनुगमन गर्न ७७ वटै जिल्लाका जिल्ला अनुगमन समितिलाई समेत विभागले अनुरोध गरेको छ।
-1746009348.jpg)
