वासिङ्टनमा अफगानी आप्रवासीले बुधबार नेसनल गार्डका दुई सुरक्षाकर्मीमाथि गोली प्रहार गरेपछि अमेरिकी राष्ट्रपति डोनाल्ड ट्रम्पले अफगानी नागरिकलाई अमेरिकी भिसा दिन रोक लगाएका छन्।
अफगानिस्तानबाट सन् २०२१ मा अमेरिका गएका रहमनुल्लाह लकनवालले बुधबार गोली प्रहार गरेपछि नेसनल गार्डका दुई सुरक्षाकर्मी गम्भीर घाइते भएका छन्।
आप्रवासी विरोधी मुद्दामा दुई पटक राष्ट्रपतीय निर्वाचन जितेका ट्रम्पले सो घटनापछि अमेरिकामा रहेका दशौं लाख आप्रवासीहरूमाथि व्यापक कारबाही गर्ने वाचा गरेका छन्।
त्यसपछि अमेरिकाको नागरिकता र अध्यागमन सेवाले अफगानी नागरिकहरूको भिसा आवेदन प्रक्रिया स्थगित गरेको भनेर द न्यू योर्क टाइम्सले लेखेको छ।
सामाजिक सञ्जालमा पोस्ट गर्दै उक्त निकायले सुरक्षा र जाँच प्रोटोकलको थप समीक्षा नभएसम्म अफगानी नागरिकहरूको भिसा आवेदन तत्काल रोकिएको जानकारी दिएको छ।
ट्रम्पलाई २०२० को निर्वाचनमा हराएर राष्ट्रपति बनेका जो बाइडेनले २०२१ मा अफगानिस्तानबाट अमेरिकी सेना फिर्ता गरेपछि लकनवाल अमेरिका गएका थिए। बुधबारको आक्रमण पछि बोल्दै अघिल्लो सरकारले विश्वभरबाट जाँच नगरिकनै विदेशीहरूलाई प्रवेश दिनुलाई ट्रम्पले सबभन्दा ठूलो राष्ट्रिय सुरक्षा खतरा भनेर वर्णन गरे।
ट्रम्पले पछिल्ला महिनाहरूमा अपराधीलाई तह लगाउन भन्दै विपक्षी डेमोक्र्याटिक पार्टीको शासन रहेका वासिङ्टन लगायत ठूला सहरहरूमा नेसनल गार्डका सैनिक खटाएका छन्। उनले खटाएका नेसनल गार्डका दुई सुरक्षाकर्मीलाई आप्रवासीले गोली हानेपछि ट्रम्प आप्रवासी र विपक्षी दुवैमाथि खनिएका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1756446574.jpg)
-1746009348.jpg)
