माडीको बघौडा अस्पतालका चिकित्सक तथा स्वास्थ्यकर्मी माथि आक्रमण गर्ने युवाहरुलाई प्रहरीले नियन्त्रणमा लिएर अनुसन्धान गरिरहेको छ।
निमित्त मेडिकल सुपरिटेण्डेण्ट डा. धिरंजनकुमार साहका अनुसार गत विहीबार अस्पतालका दुई चिकित्सक र दुई हेल्थ असिस्टेन्सलाई स्थानीय युवाहरुले आक्रमण गरेका थिए। राति सवा १० बजेतिर चार/पाँच जनाको समूहमा आएका युवाहरुले डा. दिपेन्द्र विश्वास, डा. देवेन्द्र विश्वास, हेल्थ असिस्टेन्स अनुप सुवेदी, कविराज तिवारी लगायतका चिकित्सक तथा स्वास्थ्यकर्मीमाथि कुटपिट गरेका थिए। ती युवाहरुले मादक पदार्थ सेवन गरेर स्वास्थ्यकर्मीमाथि आक्रमण गरेको दाबीसहित अस्पतालले ईलाका प्रहरी कार्यालय माडीमा निवेदन दिएको छ।
जिल्ला प्रहरी प्रमुख एसपी गोबिन्द पुरीले आक्रमणमा संलग्न रहेका चार जनालाई नियन्त्रणमा लिएर अनुसन्धान भइरहेको जानकारी दिए। अस्पतालतर्फबाट किटानी जाहेरी प्राप्त नभए पनि स्वास्थ्यकर्मीमाथि कुटपिटको सूचनाको आधारमा नियन्त्रणमा लिएर अनुसन्धान गरिएको जानकारी उनले दिए।
एसपी पुरीकाअनुसार विहीबार दिउँसो अस्पतालका चिकित्सक, स्वास्थ्यकर्मी र स्थानीय युवाहरुले एउटै रेष्टुरेन्टमा खाजा खएका थिए।
‘एउटै रेष्टुरेन्ट भए पनि छुट्टा–छुट्टै खाएका रहेछन्। उठेर अस्पतालतिर जाँदा स्वास्थ्यकर्मी र युवाहरुका बीचमा झगडा भएछ। त्यहीँ दुबैतर्फका केही घाइते भएका रहेछन्। पछि अस्पतालमा उपचारकोक्रममा पनि फेरि झगडा भएछ,’ पुरीले भने, ‘माडीको प्रहरीले यस विषयमा थप अनुसन्धान गरिरहेको छ।’
निमित्त मेडिकल सुपरिटेण्डेण्ट डा. साहले अस्पतालको शान्ति सुरक्षामा खलल हुने गरी अनैतिक क्रियाकलाप गरिएको उक्त घटनाको निष्पक्ष छानविन गरी दोषी उपर कानुनी कारवाही गर्न माग गरेका छन्।
नेपाल चिकित्सक संघ चितवनका सचिव डा.महेन्द्र अग्रहरीले दोषीलाई कानुनी कारवाही हुनुपर्ने माग गरेका छन्। अस्पताल जस्तो संवेदनशील स्थानमा होहल्ला, गालिगलौज तथा आक्रमणका घटना हुनु दुःखद् भएको उनले बताए।
-1746009348.jpg)
