अमेरिकाको क्यालिफोर्नियास्थित स्कटन सहरको एउटा ब्यांक्वेटमा गोली चलेको छ।
स्थानीय समयअनुसार शनिबार साँझ ६ बजे जन्मदिनको उत्सव भइरहेको ब्यांक्वेटको हलभित्र अन्धाधुन्ध गोली चलेको हो।
अमेरिकी टेलिभिजन नेटवर्क सिएनएनका अनुसार जन्मदिन मनाउने कार्यक्रममा झन्डै डेढ सय जना सहभागी थिए।
कार्यक्रम हुँदै गर्दा अन्धाधुन्ध गोली चल्दा तीन बालकसहित चार जनाको घटनास्थलमै मृत्यु भएको छ।
मृत्यु हुनेमा ८,९ र १४ वर्षका बालबालिका तथा २१ वर्यका युवा रहेका छन्। उनीहरुको नाम सार्वजनिक गरिएको छैन।
अन्तर्राष्ट्रिय समाचार संस्था रोयटर्सका अनुसार गोलीकाण्डमा १४ जना घाइते छन्। घाइतेहरूको उपचार भइरहेको छ।
गोली चलाउने व्यक्ति फरार छन्।
क्यालिफोर्नियाका गभर्नर गेभिन न्युसमलाई घटनाबारे जानकारी गराइएको छ। उनले सामाजिक सञ्जालमार्फत स्टकटन समुदायप्रति समवेदना व्यक्त गर्दै पीडित परिवारहरूप्रति ऐक्यबद्धता जनाएका छन्।
स्टकटनकी मेयर क्रिस्टिना फुगाजीले पनि राज्य सरकारबाट पूर्ण सहयोगको आश्वासन प्राप्त भएको जनाएकी छन्।
घटनाप्रति अमेरिकी कांग्रेसकी पूर्व सदस्य तथा बन्दुक हिंसा पीडित ग्याबी गिफोर्ड्सले गहिरो दुःख प्रकट गर्दै संघीय तहमा कडा कदम चाल्नुपर्ने माग गरेकी छन्। उनले अमेरिकामा बढ्दो बन्दुक हिंसा रोक्न अब ढिलाइ गर्न नहुने बताएकी छन्।
अमेरिकामा यस वर्ष मात्रै कम्तीमा ३८० वटा सामूहिक गोलीकाण्डका घटना भइसकेको छ।
केही दिनअघि मात्रै वाशिङ्टन डिसी स्थित ह्वाइट हाउस नजिकै एक अफगानी नागरिकले दुई जना अमेरिकी नेसनल गार्डका सुरक्षाकर्मीमाथि गोली चलाएका थिए।
सो घटनामा एक सुरक्षाकर्मीको मृत्यु भएको छ भने अर्का सुरक्षाकर्मीको उपचार भइरहेको छ।
घटनापछि अमेरिकी सरकारले अफगानी नागरिकलाई भिसा प्रतिबन्ध लगाएको छ।
पछिल्ला महिनाहरूमा विभिन्न सहर, विद्यालय, सुपरमार्केट र कार्यालय परिसरमा भएका गोलीकाण्डका घटना भएका थिए।
-1746009348.jpg)
