प्रहरीले पेस्तोलसहित तीन जनालाई पक्राउ गरेको छ।
भदौ २४ गते प्रहरी वृत्त स्वयम्भूबाट लुटिएको पेस्तोलसहित तीन जनालाई पक्राउ गरेको काठमाडौं उपत्यका अपराध अनुसन्धान कार्यालयका एसपी काजीकुमार आचार्यले जानकारी दिए।
पक्राउ पर्नेमा कलंकीका २८ वर्षीय रसिल जोशी, दार्चुला घर भएर सुन्धारा बस्ने १९ वर्षीय डेबिड भन्ने रामचन्द्र कुँवर र बाफल बस्ने ३१ वर्षीय विराटप्रसाद जोशी छन्।
जेनजी आन्दोलनको क्रममा भदौ २४ गते काठमाडौं उपत्यकाका विभिन्न स्थानमा रहेका प्रहरी कार्यालयमा तोडफोड तथा लुटपाट भएका थिए।
अनुसन्धान गर्ने क्रममा लुटिएको हतियारसहित तीन जनालाई प्रहरीले पक्राउ गरेको हो।
एसपी आचार्यका अनुसार पक्राउ परेका रसिल लागुऔषध मुद्दामा साउन २६ गतेदेखि हिरासतमा थिए।
अनुसन्धानमा रहेका उनी भदौ २४ गते तोडफोड भएपछि हिरासतबाट भागेका थिए। त्यस क्रममा त्यहाँ उनको भेट डेबिड र विराटप्रसादसँग भएको थियो।
उनीहरू तीन जनाले स्वयम्भूमा रहेको टाइप ५४ को पेस्तोल लुटेका थिए।
यसरी लुटिएको पेस्तोल बेच्नका लागि उनीहरूले ग्राहकको खोजी गरिरहेको अनुसन्धानबाट खुलेको छ।
पेस्तोल भने डेबिडले आफूसँग राखेका थिए।
‘उनीहरू ग्राहकको खोजीमा थिए। कतिपयसँग कुराकानी गरेका पनि रहेछन्। उनीहरूलाई भेटेर मूल्यबारे टुंगो लगाउने भनिएको पायौं। त्यसैक्रममा हामीलाई सूचना आएको हो,’ उनले भने।
सूचना आएपछि प्रहरीले तीनै जनालाई पक्राउ गरेको हो।
थप अनुसन्धानका लागि तीनै जनालाई जिल्ला प्रहरी परिसर काठमाडौंमा पठाएको छ।
-1764586222.jpg)
-1746009348.jpg)
