युरोपेली जहाज निर्माता कम्पनी एयरबसले विश्वभरका करिब ६ हजार ए ३२० सिरिजका जहाजमध्ये लगभग सबैको सफ्टवेयर अपडेट भइसकेको जानकारी दिएको छ।
एयरबसले शुक्रबार ए३२० सिरिजका जहाजको सफ्टवेयरमा समस्या देखिएकाले सबैमा प्राविधिक परीक्षण गर्नू भनेपछि शनिबारदेखि विश्वका ६ हजारभन्दा बढी ए ३२० जहाज अस्थायी रूपमा ग्राउन्डेड भएका थिए।
त्यसमध्ये लगभग सबैले सप्ताहन्तमा सफ्टवेयरमा आवश्यक अपडेट गरिसकेको भनेर ब्लुमबर्गले लेखेको छ।
सोमबार एक विज्ञप्ति निकाल्दै एयरबसले अब १०० भन्दा कम विमानहरूको मात्र सफ्टवेयर ठिक गर्न बाँकी रहेको जनाएको छ।
करिब एक महिना अघिको एउटा घटनाले सुरक्षित उडान सुनिश्चित गर्नका लागि ए३२० मा प्रयोग हुने सफ्टवेयरमा तत्काल अपडेटको आवश्यकता देखिएको एयरबसले शुक्रबार भनेको थियो।
यसले विश्वभरमा लगभग ६ हजार ए३२० विमान ग्राउन्डेड भए पनि समस्याको समाधान भने चाँडै भएको ब्लुमबर्गले जनाएको छ।
उडान नियन्त्रण गर्ने सफ्टवेयरको अघिल्लो संस्करणको अपडेट धेरैजसो एयरलाइन्सका लागि एकदमै छिटो भयो। एकदमै थोरै विमानमा मात्र यो प्रक्रिया जटिल रह्यो।
एयरबसले विश्वभरका ए३२० सिरिजका जहाज ग्राउन्डेड गर्न निर्देशन दिए पनि नेपाल वायुसेवा निगमको जहाजले भने नियमित उडान गरे।
'एयरबसबाट फ्लाइट कन्ट्रोल भन्ने सिस्टमको सफ्टवेयर अपडेट गर्ने भनेर सूचना आएको थियो,' निगम स्रोतले सेतोपाटीलाई भन्यो, 'हामीले प्रयोग गरिरहेको जहाजमा अहिले त्यो सफ्टवेयर नभएकाले नियमित उडान गरे।'
स्रोतका अनुसार एयरबसले ए३२० सिरिजका जहाज ग्राउन्डेड गर्न भनेपछि निगमले पनि सबै प्राविधिक परीक्षण गरेको थियो। तर जहाजमा उक्त सफ्टवेयर नै नभेटिएकाले उडानमा कुनै समस्या नरहेको उनले जानकारी दिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
