बाँके प्रहरीले पछिल्ला १९ दिनको अवधिमा करिब ३७ लाख रुपैयाँ बराबरका भन्सार छलीका सामग्री बरामद गरेको छ। भन्सार कार्यालयसँगै प्रहरीले हाल ठूलो पसल र गोदामहरूमा समेत छापा तीव्र पारेपछि विभिन्न स्थानबाट ठूलो परिमाणमा सामान बरामद भएको हो।
मंसिर १९ गते नेपालगन्ज–१ गुलरिया बसपार्क नजिक मुबारक अहमद कडरियाको पसलबाट करिब ३३ हजार ९ सय किलो (१,१३० बोरा) मटर दाल जफत गरिएको प्रहरीले जनाएको छ। हालको बजार मूल्यअनुसार दालको मूल्य २० लाख ३४ हजार रुपैयाँ बराबर पर्ने प्रहरी निरीक्षक रमेश विष्टले बताए। बरामद दालसहित मुस्कान ट्रेडर्सका सञ्चालक कडरियालाई पक्राउ गरी भन्सार कार्यालयमा बुझाइएको छ।
यसअघि मंसिर १७ गते च्याउ, चिनी र चामलसहित एक लाख ७० हजारभन्दा बढी मूल्यका सामग्री बरामद गरिएको थियो। मंसिर १४ गते बुलबुलियामा कजिम कबडियाबाट अवैध रूपमा ल्याइएको २७ हजार रुपैयाँ बराबरको त्रिपाल र अन्य सामग्री जफत गरिएको थियो।
मंसिर १३ गते नेपालगन्जका विभिन्न स्थानबाट कच्चा कपडा, मोटर पार्ट्स, चिनी, खाद्यान्न र पेय पदार्थसहित झन्डै ६ लाख ७७ हजार रुपैयाँ बराबरका सामग्री प्रहरीले नियन्त्रणमा लिएको थियो।
मंसिर ११ गते भुजइगाउँस्थित आकाश राइस मिल तथा फ्लोर मिलमा छापा मार्दा चामल, दाल र तेल गरी एक लाख २६ हजार रुपैयाँ बराबरका सामान जफत गरियो।
मंसिर ६ गते विभिन्न स्थानबाट वासिङ मेसिन, कुलरलगायत करिब ४८ हजार रुपैयाँका सामग्री बरामद भए। मंसिर ३ गते सुर्ती, लुगाफाटा, डिजिटल तराजु, चामल, दाल, केराउ, सूटकेस, सुट सिलाइ मेसिनलगायत ४ लाख ७४ हजार रुपैयाँ बराबरका सामग्री जफत गरिएको थियो। सोही दिन प्रहरीले धम्बोझीबाट भारतबाट अवैध रूपमा ल्याइएको २४ किलो माछा समेत नियन्त्रणमा लिई क्वारेन्टाइन कार्यालय पठाएको थियो।
मंसिर १ गते पनि जुत्ता, सुर्ती, तरकारी र भेलीलगायत एक लाख ३८ हजार रुपैयाँभन्दा बढीका सामग्री जफत भएका थिए।
बरामद भएका सबै सामग्री आवश्यक कारबाहीका लागि भन्सार कार्यालय पठाइएको जिल्ला प्रहरीका अधिकारीहरूले बताएका छन्।
यसैबीच, दाङ प्रहरीले नदी तथा खोला जन्य पदार्थ चोरी निकासी रोक्न पछिल्ला १९ दिनमा १८ सवारीसाधनमाथि कारबाही गरेको छ।
मंसिर १ देखि १९ गतेसम्म १३ ट्रयाक्टर, तीन टिप्पर र दुई जेसिबी नियन्त्रणमा लिई कारबाही गर्दा चार लाख ३७ हजार रुपैयाँ राजस्व संकलन भएको जिल्ला प्रहरी कार्यालयले जनाएको छ।
स्थानीय सरकारले समयमै खोला–नदीका बालुवा, गिट्टी र ढुंगाका ठेक्का नखोलेका कारण पछिल्ला वर्षहरूमा चोरी निकासी बढ्दै गएको सरोकारवालाहरूको भनाइ छ।
-1746009348.jpg)
