तन्त्रमन्त्र गरी बिरामी पारेको अन्धविश्वासकै भरमा सुनसरीमा सुपारी दिएर एक जना सफारी चालकको हत्या गर्न लगाएको तथ्य खुलेको छ।
रामधुनी नगरपालिका–२ का सिटी सफारी चालक दिनेशकुमार चौधरीको असोज २५ गते साँझ हत्या भएको थियो। ४५ वर्षीय चौधरीले आफूलाई तन्त्रमन्त्र लगाएर बिरामी पारेको भन्दै राजेश साहले उनको हत्या गर्ने योजना बुनेको सुनसरी प्रहरीले जनाएको छ।
हत्यामा संलग्न रहेको अभियोगमा पक्राउ परेका सात जनालाई सोमबार इनरुवामा सार्वजनिक गर्दै सुनसरी प्रहरीले यस्तो जानकारी दिएको हो।
प्र–१–०२–००४ ह ७८०४ नम्बरको सफारीका चालक चौधरी आफ्नो सफारी लिएर उत्तरबाट दक्षिणतर्फ जाँदै गर्दा उनीमाथि रामधुनी नगरपालिका-२ मा गोली प्रहार भएको थियो। बायाँ छातीमा गोली लागेका उनको उपचारका क्रममा मृत्यु भएको थियो।
सुनसरी प्रहरीका प्रवक्ता एवं डिएसपी चन्द्रबहादुर खड्काले दिएको जानकारी अनुसार प्रहरीले योजनाकार राजेश साह, नन्दकिशोर साह, मोहम्मद इव्राइम मिया, अंकित साह, प्रिन्सकुमार दास, गियास मन्सुरी र मिथलेश यादवलाई पक्राउ गरेको छ।
पक्राउ परेकामध्ये राजेश साहले आफूलाई चौधरीले तन्त्रमन्त्र गरेर बिरामी पारेको भन्दै हत्याको योजना बनाएको प्रहरीलाई बयान दिएका छन्।
चौधरीको हत्या गर्न राजेशले ६ लाख ५० हजार रूपैयाँ सुपारी दिएर सुटर मोहम्मदलाई प्रयोग गरेको र उनले ३ लाख रूपैयाँ पेस्की लगेको प्रहरीको भनाइ छ।
-1746009348.jpg)
