जापानको उत्तर–पूर्वी क्षेत्र आइओमोरी वरपर मंगलबार राति ७.५ म्याग्निच्युडको शक्तिशाली भुइँचालो गएको छ।
भुइँचालोमा परेर कम्तीमा ३० जना घाइते भएका छन् भने हजारौं मानिसलाई घर छाडेर सुरक्षित स्थानमा सारिएको छ।
जापान मौसम विज्ञान एजेन्सीका अनुसार भुइँचालो राति ११:१५ बजे (स्थानीय समय) गएको थियो। यो समुद्री सतहभन्दा करिब ५० किलोमिटर गहिराइबाट सुरू भएको थियो।
भुइँचालोको केन्द्रविन्दु आइओमोरी तटबाट करिब ८० किलोमिटर टाढा छ।
भुइँचालोपछि सुनामीको चेतावनी जारी गरिएको थियो, जुन पछि फिर्ता लिइएको छ। समुद्री छाल ७० सेन्टिमिटरसम्म उठेको पुष्टि गरिएको छ।
भुइँचालोपछि केही रेल सेवा स्थगित गरिएको छ भने हजारौं घरमा विद्युत् आपूर्ति अवरूद्ध भएको छ। अधिकारीहरूले आगामी केही दिन अझै शक्तिशाली परकम्पन आउने सम्भावना रहेको भन्दै कम्तीमा एक सातासम्म सतर्क रहन आग्रह गरेका छन्।
भुइँचालोबाट प्रभावित नागरिकलाई सम्बोधन गर्दै जापानकी प्रधानमन्त्री साने ताकाइचीले दैनिक तयारी जाँच गर्न आग्रह गरेकी छन्।
'फर्निचर मजबुत रूपमा बाँध्नुहोस् र कम्पन महसुस भए तुरून्त सुरक्षित स्थानमा जान तयार रहनुहोस्,' उनले भनिन्।
समाचार एजेन्सी रोयटर्सका अनुसार करिब ९० हजार बासिन्दालाई सुरक्षित स्थानमा सार्न निर्देशन दिइएको छ। आइओमोरीको प्रान्तीय सरकारले करिब २ हजार ७ सय घरमा विद्युत् अवरूद्ध भएको जनाएको छ। पूर्वी जापान रेल्वे कम्पनीले उत्तर–पूर्वी तटीय क्षेत्रमा केही रेल सेवा रोकिएको जनाएको छ।
जापानी सरकारले प्रधानमन्त्री कार्यालयअन्तर्गत संकट व्यवस्थापन केन्द्रमा आपतकालीन प्रतिक्रिया कार्यालय स्थापना गरेर उद्धार तथा राहत कार्य सुरू गरेको छ।
भुइँचालोपछि तोहोकु इलेक्ट्रिक पावर कम्पनीले हिगाशिदोरी र ओनागावा परमाणु विद्युत् केन्द्रमा कुनै समस्या नदेखिएको जनाएको छ। त्यस्तै, फुकुसिमा परमाणु केन्द्रमा पनि कुनै असामान्य अवस्था नदेखिएको जापानी अधिकारीहरूले अन्तर्राष्ट्रिय आणविक ऊर्जा एजेन्सीलाई जानकारी गराएका छन्।
सन् २०११ मा यही क्षेत्रमा ९ म्याग्निच्युडको शक्तिशाली भुइँचालो गएको थियो, जसले सुनामी निम्त्याउँदा १८ हजारभन्दा बढीको ज्यान गएको थियो।
जापान संसारकै बढी भुइँचालो आउने मुलुकमध्ये एक हो। यो 'रिङ अफ फायर' क्षेत्रमा पर्ने भएकाले यहाँ बर्सेनि करिब १५ सय भुइँचालो जान्छन्।
-1746009348.jpg)
