बर्दियाको एक कटेजमा युवकमाथि गोली प्रहार गरी हत्या गर्ने फरार आरोपीको पहिचान भएको प्रहरीले जानकारी दिएको छ।
दाङको तुलसीपुर उपमहानगरपालिका–६ का २८ वर्षीय निरज चौधरीको बर्दियाको राजापुर नगरपालिका–४ स्थित रेष्टुरेण्टभित्रै आइतबार बिहान ११ बजेतिर गोली हानेर हत्या भएको थियो।
निरजलाई गोली हान्ने व्यक्ति दाङ तुलसीपुर–६ कै स्थायी बासिन्दा ५१ वर्षीय महावीर चौधरी रहेको तथ्य फेला परेको बर्दियाका प्रहरी प्रमुख एसपी सरोज पौडेलले सेतोपाटीलाई बताए।
‘हत्या गरिएका निरजलाई हत्या फरार रहेका आरोपीले विदेश पठाइदिने भनेर पैसा लगेको प्रारम्भिक अनुसन्धानबाट खुलेको छ,’ एसपी पौडेलले भने, ‘त्यही पैसा माग्दा आपसमा विवाद भएको र होटलभित्रै गोली हानेर साहु फरार भएको भन्ने हालसम्मको अनुसन्धानबाट खुलेको छ।’
स्रोतका अनुसार हत्या गरिएका निरज नाताले महावीरका नाति हुन्। उनीहरू एकै ठाउँका आफन्त हुन्।
अमेरिका र नेपाल आउजाउ गरिरहने महावीरले तल्लो बाटो अमेरिका पठाउने भनेर विभिन्न आफन्तसँग पैसा उठाउने काम गर्दै आएका थिए।
निरजलाई पनि तल्लो बाटो अमेरिका पठाइदिने भनेर महावीरले पैसा लगेका थिए।
अमेरिकामा ट्रम्प राष्ट्रपति निर्वाचित भएपछि तल्लो बाटो (डंकी रूट) हुँदै जोखिम मोलेर अमेरिका जाने बाटो बन्द भएको छ।
जिल्ला प्रहरी प्रमुख एसपी पौडेलका अनुसार हत्या गरिएका निरज लुम्बिनी प्रदेशका पूर्वमुख्यमन्त्री डिल्लीबहादुर चौधरीको बर्दियास्थित जग्गामा खोलिएको पोल्ट्री फर्म रेखदेख गर्न ल्याइएका युवक हुन्। जुन पोल्ट्री फर्म विगतमा मुख्यमन्त्री चौधरीकी सहोदर बहिनी विजया चौधरी कार्कीले रेखदेख गर्दै आएकी थिइन। पछिल्लो समय उनले पोल्ट्री फर्म छोडेकी थिइन्। त्यसैले निरजलाई दाङबाट त्यहाँ लगिएको थियो।
सोही पोल्ट्री फर्मको नजिकै ‘हमार थारु घर एण्ड रेष्टुरेण्ट’ पनि थियो।
एसपी पौडेलका अनुसार त्यो रेष्टुरेष्टका संचालक महावीर आफै रहेको प्रारम्भिक अनुसन्धानबाट खुलेको छ।
जिल्लाका निमित्त प्रवक्ता प्रहरी निरीक्षक प्रकाशसिंह कार्कीले भने फरार अभियुक्त महावीर होटलको पाटर्नर भएको तथ्य खुलेको बताए।
बर्दियाको राजापुर नगरपालिका – ४ की रामकुमारी थारूको नाममा होटल दर्ता रहेको खुलेको छ।
आफन्तको जग्गा भाडामा लिएर उनीहरूले त्यो होटल तथा रेष्टुरेण्ट संचालन गर्दै आएको भन्ने खुलेको प्रहरी निरीक्षक कार्कीले बताए।
महावीरले नाति पर्ने निरजलाई आफ्नै होटलमा आइतबार बिहान ११ बजेतिर गोली प्रहार गरेपछि पाटर्नर रामकुमारी थारूलाई भनेर सुटुक्क बर्दियाभन्दा टाढाको बाँकेको नेपालगंजस्थित नरसिंह होममा उपचारका लागि पठाएर आफू भागेका थिए।
एसपी पौडेलका अनुसार प्रहरीले रामकुमारीका साथै उनका श्रीमान बुद्धि थारू र २२ वर्षीय छोरा राहुल थारूलाई पनि नियन्त्रणमा लिएर घटना अनुसन्धान अघि बढाएको छ।
तुलसीपुर–६ डुम्री गाउँकै महावीरका कतिपय नजिकका आफन्तले समेत आफूहरूलाई अमेरिकाको प्रलोभन देखाएर महावीरले लाखौं पैसा ठगी गरेको हुँदा आफूहरू घरबारविहीन हुनुपर्ने अवस्था आउन थालेको सेतोपाटीसँग बताउने गरेका छन्।
घटनास्थलबाट प्रहरीले गोलीको खोका फेला पारिसकेको एसपी पौडेलले सेतोपाटीलाई बताए।
निरजको घर परिवारले मंगलबार बर्दिया प्रहरीमा फरार रहेका महावीर चौधरी विरूद्ध किटानी जाहेरी दिने तयारी गरेको छ।
प्रहरीले घटनास्थलबाट महावीरको पासपोर्ट, भिसा लगायतका कागजात पनि बरामद गरेको छ।
यो पनि:
विदेश नपठाएपछि पैसा फिर्ता माग्दा साथीले नै गरे गोली हानेर हत्या
-1746009348.jpg)
