अमेरिकी राष्ट्रपति डोनाल्ड ट्रम्पले अमेरिकी कम्पनी एनभिडियालाई ‘एच २००’ चिप्स चीनमा निर्यात गर्न दिने भएका छन्।
वस्तु उत्पादनमा विश्वको सबभन्दा उत्कृष्ट देश बनेको चीन आर्टिफिसियल इन्टेलिजेन्स (एआई) प्रविधिमा भने अमेरिकाभन्दा अलिक पछि छ। सो क्षेत्रमा आफ्नो अग्रता कायम राख्न अमेरिकाले एआई प्रविधिका लागि चाहिने शक्तिशाली चिप्स चीनलाई बेच्न बन्देज लगाएको छ। चीनलाई हाल बेच्न खुला गरिएको सबभन्दा शक्तिशाली चिप्स एनभिडियाको 'एच २०' हो।
अक्टोबरको अन्त्यमा ट्रम्प र चिनियाँ समकक्षी सी चिनफिङले भेटेपछि एक वर्षका लागि व्यापार–युद्ध विराम गरेका थिए।
सो भेटमा चीनलाई शक्तिशाली चिप्स बेच्न लगाइएको प्रतिबन्ध अमेरिकाले खुकुलो बनाएको समाचार आएका थिए। एनभिडिया कम्पनीले बनाउने सबैभन्दा शक्तिशाली 'ब्ल्याकवेल बी ३० ए चिप्स' चीनलाई बेच्न दिन सो कम्पनीले ट्रम्पसँग लगातार आग्रह गरिरहेको थियो। तर, ट्रम्पले त्यतिबेला सो चिप्सबारे कुनै सहमति नभएको बताएका थिए।
'ब्ल्याकवेल बी ३० ए चिप्स' बेच्न नदिए पनि हाल बेच्न खुला गरिएको एनभिडियाको 'एच २०' भन्दा धेरै शक्तिशाली 'एच २००' चिप्स बेच्न ट्रम्पले अहिले खुला गरेका छन्।
आफ्नो सामाजिक सञ्जाल ट्रुथ सोसलमा सोमबार पोस्ट गर्दै ट्रम्पले एनभिडिया कम्पनीले २५ प्रतिशत राजश्व तिरेर सो चिप्स चीनलाई बेच्न पाउने घोषणा गरेका छन्।
उनले त्यसबारे सीलाई जानकारी दिएको र सो निर्णयलाई सीले सकारात्मक रूपमा लिएको पनि खुलासा गरेका छन्।
ट्रम्पको यो निर्णयले विश्वको सबैभन्दा ठूलो कम्पनी एनभिडियालाई अर्बौं डलरको फाइदा हुनेछ। तर उनको यो कदमले चीनले एआई प्रविधिको होडमा अमेरिकालाई भेटेर पछि पार्न सक्ने भनेर अमेरिकामै विरोध भएको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
