लियोनेल मेसीको भारत भ्रमण शनिबार कोलकाताबाट सुरू भयो। तर पहिलो दिन साल्ट लेक स्टेडियममा भएको कार्यक्रममा मेसीलाई राम्रोसँग देख्न नपाएको भन्दै आक्रोशित दर्शकले स्टेडियमभित्र बोतल र कुर्सी फ्याँकेका भिडिओ अहिले सामाजिक सञ्जालमा भाइरल छन्।
मेसी कार्यक्रमबाट चाँडै बाहिरिएपछि उनलाई राम्रोसँग देख्न नपाएको भन्दै प्रशंसक आक्रोशित भएका थिए। स्टेडियममा ठूलो हंगामा मच्चिएको थियो।
बिबिसीका अनुसार यो घटनापछि पश्चिम बंगाल प्रहरीले अवस्था सामान्य रहेको र कार्यक्रमका मुख्य आयोजकलाई पक्राउ गरिएको जनाएको छ।
पश्चिम बंगाल प्रहरीका एडिजी जावेद शमीमले मुख्य आयोजक पक्राउ परिसकेको जानकारी दिँदै भने, 'अहिले अवस्था सामान्य छ। अनुसन्धान भइरहेको छ। मुख्य आयोजक पक्राउ परेका छन्। कसको जिम्मेवारी हो भन्ने विषयमा छानबिन गरिनेछ।'
आयोजकले टिकटको पैसा फिर्ता गर्ने वाचा गरेको पनि उनले बताए।
मेसी हेर्न आएका एक प्रशंसकले ५ हजार रूपैयाँको टिकट तिरेर कार्यक्रममा आए पनि मेसीलाई राम्ररी देख्न नपाएको भन्दै आक्रोश व्यक्त गरे।
'भिभिआइपीहरू किन मेसीकै वरिपरि थिए? हामीले त मेसीलाई देख्नै पाएनौं,' उनले भने, 'हामीलाई पैसा फिर्ता चाहिन्छ।'
मेसीको एक झलकका लागि दार्जिलिङदेखि आएका एक प्रशंसक कार्यक्रमको अनुभव निकै निराशाजनक भएको बताए।
यो घटनापछि अहिले पश्चिम बंगालको राजनीति चर्किएको छ। पश्चिम बंगालकी मुख्यमन्त्री ममता बनर्जीले स्टेडियममा भएको अव्यवस्थाप्रति दुःख व्यक्त गर्दै माफी मागेकी छन्।
उनले सामाजिक सञ्जाल 'एक्स' मा लेखेकी छन्, 'साल्ट लेक स्टेडियमको अव्यवस्था देखेर म अचम्मित भएँ। हजारौं खेलप्रेमी आफ्नो मनपर्ने खेलाडी मेसीको झलक पाउन त्यहाँ भेला भएका थिए।'
उनले घटनाको छानबिन गर्न मुख्य सचिवसहितको जाँच समिति गठन गर्ने घोषणा पनि गरेकी छन्।
समितिले घटनाको विस्तृत छानबिन गरी दोषी पहिचान गर्ने र भविष्यमा यस्तो नहोस् भनेर सुझाव दिने बताइएको छ।
विपक्षी दल भाजपा भने ममता बनर्जीको आलोचनामा ओर्लिएको छ। भाजपा प्रवक्ता अमित मालवीयले यो घटनालाई सरकारको अव्यवस्थापन र भ्रष्टाचारको उदाहरण भनेका छन्। उनले जिम्मेवार व्यक्तिहरूले राजीनामा दिनुपर्ने माग गरेका छन्।
मेसीको भारत भ्रमण कोलकाता, मुम्बई, नयाँ दिल्ली र हैदराबाद गरी चार सहरमा हुनेछ। सन् २०२२ फिफा विश्वकप विजेता मेसी १५ वर्षभन्दा बढी समयपछि भारत आएका हुन्।
यसअघि उनी सन् २००९ मा कोलकातामै मैत्रीपूर्ण खेल खेल्न आएका थिए।
प्रशंसकहरूलाई मेसीसँग व्यक्तिगत रूपमा भेट्ने र फोटो खिचाउने अवसर पनि दिइएको छ। 'मेसी टूर मिट एन्ड ग्रीट' कार्यक्रमका लागि १० लाख रूपैयाँको टिकट राखिएको छ।
दस लाख रुपैयाँको टिकटमा मेसीसँग व्यक्तिगत भेट र हात मिलाउने मौका दिइनेछ। मेसीसँग समूह फोटोको अवसर र खाना पनि उपलब्ध हुनेछ।
कोलकातामा मेसीको करिब ७० फिट अग्लो प्रतिमा पनि बनाइएको छ। यो प्रतिमा ४५ जनाको टोलीले २७ दिनमा तयार पारेको हो।
लियोनेल मेसीले क्लब र देशका लागि अहिलेसम्म ४४ वटा ट्रफी जितिसकेका छन् र फुटबल इतिहासका महान खेलाडी मानिन्छन्।
-1763886130.jpeg)
-1746009348.jpg)
