दाङको लमही नगरपालिका–५ स्थित ‘जुनतारा सुनचाँदी’ पसलमा लुटपाट गर्ने उद्देश्यले गोली चलाउने युवक पक्राउ परेका छन्।
पक्राउ परेका युवक लागूऔषध मुद्दामा १५ वर्ष कैद र पाँच लाख जरिवाना तोकिएका व्यक्ति हुन्। जो जेनजी आन्दोलनका क्रममा भदौ २४ गते कारागारमा उत्पन्न असहज परिस्थितिको फाइदा उठाउँदै तुलसीपुरस्थित कारागारबाट भागेको खुलेको छ। गोली प्रहारपछि फरार रहेका दाङ बंगलाचुली गाउँपालिका-४ काभ्रे गाउँका ३३ वर्षीय किरण भनिने लेखराज केसीलाई प्रहरीले पक्राउ गरेको हो।
रूकुम जिल्ला अदालत मुसिकोटले केसीलाई २०७७ फागुन २७ गते अफिम ओसारपसार गरेको कसुरमा १५ वर्ष कैद र पाँच लाख रुपैयाँ जरिवानाको फैसला सुनाएको थियो।
गत मंसिर २० गते दिउँसो साढे १ बजेतिर उनै लेखराज जुनतारा सुनचाँदी पसलमा सुनका गरगहनाहरू खरिद गर्न गएका थिए। उनी रा १ प २६४९ नम्बरको मोटरसाइकलमा त्यहाँ पुगे।
पसलका सञ्चालक सुमन सुनारलाई फोन गरी आफू शनिबार नै भए पनि गहना किन्न आउन लागेको जानकारी गराएका थिए। सुनार जिल्ला बाहिर रहेको हुँदा उनले पसलमा काम गर्ने कर्मचारी १८ वर्षीय दिपक सुनारलाई पठाए।
तर, जब दिपकले पसल खोलेर काउन्टरमा प्रवेश गरी सुनका गरगहना देखाउँदै थिए, एकाएक लेखराजले सबै सुन र गरगहना आफूलाई दिन जोरजबरजस्ती गर्न थाले। दिपकले लेखराजले भनेको कुरा मानेनन्। त्यसपछि एकाएक पेस्तोल निकालेर दिपकलाई लक्षित गर्दै लेखराजले गोली प्रहार गरेको आरोप छ। काउन्टर बाहिरैबाट दिपकलाई लक्षित गरी पेस्तोलबाट प्रहार गरिएको गोलीले काउन्टरको सिसा तोड्दै दिपकको चिउडो नजिक घाँटीको मासु छेडेर निस्किएको हुँदा उनी जोगिएका थिए।
गोली चलेको आवाजपछि लेखराज मोटरसाइकल घटनास्थलमै छाडेर भागेका थिए।
सुन पसलमा दिनदहाडै लुटपाटको उद्देश्यले गोली चलेको सूचना पाएर वडा प्रहरी कार्यालय लमहीबाट कार्यालय प्रमुख प्रहरी निरीक्षक रोशनराज पाण्डेयको कमाण्डमा प्रहरी टोली घटनास्थलमा खटिएको थियो।
घटनास्थल वरपर स्वचालित पेस्तोल जस्तो हतियारबाट फायर भएको गोलीको एक थान खोका, गोली प्रहार घटनामा संलग्न व्यक्तिले लगेको भनिएको कालो रङको एउटा झोला र कालो रङको एउटा हेल्मेट फेला परेको थियो।
गोली चलेको सूचना पाएपछि केहीबेरमै २४ किलोमिटर टाढा घोराहीस्थित जिल्ला प्रहरी कार्यालयबाट दाङका प्रहरी प्रमुख एसपी दिपक श्रेष्ठ पनि घटनास्थल पुगेर घटना अनुसन्धान गरेका थिए।
घटनामा संलग्न व्यक्तिको हुलिया बमोजिम खोजतलास तथा पक्राउका लागि विभिन्न स्थानहरूमा चेकपोस्ट स्थापना, सिभिल पोशाकमा प्रहरी परिचालन र विभिन्न होटलहरूमा खोजी सुरू गरिएको थियो।
अनुसन्धानका क्रममा फोन नम्बरको डिटेल अध्ययन गरेको थियो। जुन सिमकार्डको लोकेसन घटना भएको दिन मंसिर २० गते बिहानको समयमा दाङको घोराही पनौरा, इन्द्रेणीटोल, घोराही गुरुवागाउँ, सौडियार समेतका स्थानहरूमा देखिएको थियो। त्यस्तै दिउँसोमा लोकेसन लमही बजार र रातोडाँडा लगायतका स्थानमा देखिएको थियो।
लेखराजले सुन पसलमा गोली चलाएपछि प्रयोग गर्दै आएको सिमकार्ड नम्बर बन्द गरेका थिए। यो घटना अनुसन्धान गर्न जिल्ला प्रहरी प्रवक्ता डिएसपी चक्रबहादुर शाह नेतृत्वमा जिल्लाले एउटा टोली खटाएको थियो।
घटना विवरण विश्लेषण गर्दै अगाडि बढेको शाह नेतृत्वको टोलीले सो सिमकार्ड नम्बर मंसिर ०६ गते जिल्ला प्युठान मल्लारानी गाउँपालिका–२ स्थायी घर भएका एक जना ३७ वर्षीय युवकको नाममा दर्ता रहेको पत्ता लगायो।
ती व्यक्तिले दाङ लमही नगरपालिका–५ लमही बजारमा रहेको युनिक मोबाइल रिपेयरिङ सेन्टरबाट एकै पटक तीन वटा सिमकार्ड निकालेको पत्ता लाग्यो।
अनुसन्धानका क्रममा घोराही उपमहानगरपालिका–१ रामपुर नजिक थर्मकोट गाउँका अर्कै व्यक्तिको नाममा एउटा सिमकार्ड प्रयोग भएको तथ्य फेला पर्यो। स्थानीय सेमबहादुर बुढाको नामको सिमकार्ड प्रयोगकर्ता उनै लेखराज हुन् भन्ने निष्कर्षमा प्रहरी पुग्यो।
जसले आफै मंसिर १९ गते भान्जा नाता पर्ने बंगलाचुली–४ का २७ वर्षीय सुमन हौजाली मगरलाई फोन सम्पर्क गरी लमही बजारबाट डेढ करोडको सुनका गरगहना लुट्ने योजना सुनाएका थिए। लेखराजले मगरलाई आफूसँग पेस्तोल र ६ राउण्ड गोली रहेको हुँदा त्यसैको सहारामा सुन र गहना लुट्ने योजना सुनाएका थिए।
लेखराजले भान्जा नाता पर्ने मगरलाई लुटपाटमा साथ दिन आग्रह गर्दै सो कुरा भनेका थिए। लुटेको गरगहना आपसमा बाँड्ने आश्वासन पनि दिएको प्रहरी अनुसन्धानबाट खुलेको छ। तर, मगर हतियारको कुरा गरेको हुँदा उनी आफै जाँदैनन्।
अनुसन्धानबाट पक्राउ परेका लेखराज सुन पसलमा गोली चलाउनु भन्दा झन्डै १५ दिन पहिले लमही बजारमा रहेको दौंतरी होटल एण्ड लजमा बसेको खुलेको छ, जहाँ बसेर उनले लुटपाटको योजना बुनेको प्रहरी बताउँछ। सुमन हौजाली मगर सोही होटलका सञ्चालकका छोरा हुन्। लेखराज मगरसँगै होटलमा बस्दै आएका थिए।
मंसिर १५ गते बिहानको समयमा सुत्ने विस्तराको सिरानीमुनि सानो पेस्तोल र सोही पेस्तोलमा प्रयोग हुने ६ राउण्ड गोलीसहित लुकाइछिपाइ राखेको अवस्थामा सोही होटलमा काम गर्ने दाङ राजपुर गाउँपालिका–५ जंग्रहवा का १६ वर्षीय प्रेम चौधरीले देखेका थिए। तर, बालक चौधरीलाई हतियारको कुरा कोही कसैलाई भनेमा ज्यान लिने धम्की लेखराजले दिएका थिए। बालक चौधरीले हतियार देखेपछि भने लेखराज फेरि त्यो होटलमा बस्न गएका थिएनन्। त्यसबीचमै उनले सुन लुट्ने योजना बुनेको प्रहरी बताउँछ।
लेखराजले चलाएको गोली लागेर घाइते भएका प्युठान नगरपालिका–५ का १८ वर्षीय दिपक सुनार मंसिर २१ गते डिस्चार्ज भइसकेको प्रहरीले बताएको छ।
जिल्ला प्रहरी कार्यालय दाङले सुन पसलमा चलेको गोली काण्डमा संलग्न भनिएका पक्राउ परेका लेखराज केसीलाई आइतबार बेलुकी साढे ४ बजेपछि पत्रकार सम्मेलन गरी घटना विवरण सार्वजनिक गर्ने तयारी गरेको छ।
लमहीस्थित एक होटलमा मंसिर २७ गते राखिएको हतियार चलाउन खोज्दा पड्किएर अर्का एक जना पनि सामान्य घाइते भएका थिए।
लमहीको रातोडाँडास्थित ‘रोयल प्यालेस होटल’मा कार्यरत १८ वर्षीय सिसम गौतमको हातमा हतियार फेला पारी चलाउने क्रममा हातको औंलामा गोली लागेको थियो।
पेस्तोल होटलको कोठाको एसी माथि राखिएको देखेपछि रुम सफा गर्ने क्रममा गौतमले त्यो फेला पारी चलाउने क्रममा गोली पड्किएको थियो। होटलमा गोली पड्केको घटना बारे अनुसन्धान जारी रहेको वडा प्रहरी कार्यालय लमहीका प्रमुख प्रहरी निरीक्षक रोशनराज पाण्डेले बताएका छन्।
केसीमाथि कसले पेस्तोल राखेको हो भन्ने बारेमा पाहुनाको रेकर्ड खोतल्दै प्रहरीले अनुसन्धान जारी राखेको छ। तर, प्रहरीले सुन पसलमा गोली चलाउने व्यक्ति र होटलमा फेला परेको पेस्तोल एउटै व्यक्तिले राखेको भन्ने तथ्य हालसम्म फेला नपरेको एक प्रहरी अधिकारीले बताए। पक्राउ परेका व्यक्ति माथि थप अनुसन्धान हुने प्रहरीले बताएको छ।
-1746009348.jpg)
