नेपाली सेनाको नयाँ सबूज गणले इच्छाकामना–७ गर्दासमा गरेको स्वास्थ्य शिविरमा २७५ जनाको स्वास्थ्य परीक्षण गरिएको छ।
शनिबार नयाँ सबूज गणले इच्छाकामना गाउँपालिकाको समन्वय र कलेज अफ मेडिकल साइन्सेस भरतपुरको प्राविधिक सहकार्यमा गर्दासमा एक दिने बृहत निःशुल्क स्वास्थ्य शिविर आयोजना गरेको थियो।
शिविरमा कलेज अफ मेडिकल साइन्सेसका विशेषज्ञ डाक्टरहरूसहितको टोलीले विभिन्न रोगहरूको परीक्षण तथा उपचार सेवा प्रदान गरेका थिए।
जनरल फिजिसियन, छाला तथा यौन रोग, दन्त रोग, नाक-कान-घाँटी, स्त्री तथा प्रसूति रोग, हाडजोर्नी तथा नशा रोग, मधुमेह र बाल रोग सम्बन्धी विशेषज्ञ सेवाहरू उपलब्ध गराइएको नयाँ सबूज गणका गणपति दिनेश लामाले जानकारी दिए।
बिरामीहरूको रोग पहिचानका लागि भिडियो एक्सरे, ईसीजी, मधुमेह तथा रक्तचाप परीक्षण जस्ता सेवाहरू पनि निःशुल्क रूपमा प्रदान गरिएको उनले बताए। स्वास्थ्य परीक्षण पश्चात बिरामीहरूलाई आवश्यकता अनुसार निःशुल्क औषधि वितरण गरिएको थियो।
स्वास्थ्य उपचारमा पहुँच नभएका र आर्थिक तथा चेतनाको अभावले समयमै उपचार पाउन नसकेका स्थानीय बासिन्दाहरूलाई लक्षित गरी यो शिविर आयोजना गरिएको हो।
शिविरबाट इच्छाकामना गाउँपालिकाका १३९ महिला, ६२ जना पुरुष, ७४ जना बालबालिका लाभान्वित भएको लामाले बताए।
शिविरले नागरिक-सैनिक सम्बन्ध सुदृढ गर्नुका साथै दुर्गम क्षेत्रका नागरिकको स्वास्थ्य समस्याको प्रारम्भीक पहिचान र उपचारमा टेवा पुर्याउनुका साथै स्वास्थ्य सचेतना अभिवृद्धिमा समेत महत्त्वपूर्ण भूमिका खेलेको गणले जनाएको छ।
शिविरमा मध्य पृतना हेडक्वाटरका पृतनापति उपरथी विष्णु कुमार खड्का, नम्बर ७ बाहिनी अड्डाका बाहिनीपति सहायक रथी कमल बानिया (पिएच.डि.), नयाँ सबुज गणका गणपति प्रमुख सेनानी दिनेश लामा, इच्छाकामना गाउपालीकाको अध्यक्ष दानबहादुर गुरुङलगायतको उपस्थिति रहेको थियो।
-1746009348.jpg)
