तपाईंहरूले दुई–चार दिनयता चिसो महसुस गर्नु भएकै होला। तराई–मधेसमा हुस्सु लागेको देखिरहनु भएकै छ। पश्चिमी वायुका कारणले नेपालको मौसम प्रणालीमा केही बदलाव देखिएको हो।
काठमाडौं उपत्यकाको आकाशमा शनिबार बिहान बादल लागेको थियो। तर मध्याह्नपछि आकाश कञ्चन हुँदै गयो।
जल तथा मौसम विज्ञान विभाग, मौसम पूर्वानुमान महाशाखाका अनुसार आइतबार देशभर पश्चिमी वायुको आंशिक प्रभाव रहेको छ। जसका कारणले कुनैकुनै प्रदेशमा शनिबार बिहानजस्तै आकाशको केही भाग बादलले ढाक्ने सम्भावना छ। तराई–मधेसका भू–भागमा हुस्सु÷कुहिरो लाग्ने सम्भावना रहेको महाशाखाले जनाएका छ।
पश्चिमी वायु भित्रिएसँगै चिसो बढेको हो।
मौसम पूर्वानुमान महाशाखाका अनुसार धनगढीको शनिबारको अधिकतम तापक्रम १५.१ डिग्री सेल्सियस र न्यूनतम तापक्रम ९.०डिग्री सेल्सियस थियो। आजको न्यूनतम तापक्रम ७.२ डिग्री सेल्सियस रहनेछ।
नेपालगञ्जको शनिबारको अधिकतम तापक्रम १४.६, न्यूनतम तापक्रम ९.०डिग्री सेल्सियस रहेको थियो। आज न्यूनतम तापक्रम १०.६ डिग्री सेल्सियस रहनेछ।
भैरहवाको शनिबारको अधिकतम तापक्रम १७.०, न्यूनतम तापक्रम १२.८ र आजको ११.९ डिग्री सेल्सियस रहनेछ।
सिमराको शनिबारको अधिकतम तापक्रम १५.६, न्यूनतम १३.४, आजको न्यूनतम तापक्रम १०.६ डिग्री सेल्सियस रहनेछ।
जनकपुरको अधिकतम तापक्रम १९.६, न्यूनतम १४.५, आजको १२.६ डिग्री सेल्सियस रहनेछ। विराटनगरको शनिबारको अधिकतम तापक्रम २२.०, न्यूनतम तापक्रम १२.६, आजको १२. ६ डिग्री सेल्सियस रहनेछ।
झापा चन्द्रगढीको अधिकतम तापक्रम २४.२, न्यूनतम तापक्रम ११.४ र आजको न्यूनतम तापक्रम १३.० रहनेछ।
धनगढी क्षेत्रको भिजिबिलिटी (पारदर्शिता) २००, नेपालगञ्जको पनि २०० मिटर रहेको छ। भैरहवाको २००० मिटर छ भने सिमराको ५०० मिटर छ। जनकपुरको पारदर्शिता १४०० मिटर, विराटनगर र चन्द्रगढीको ४००–४०० मिटर रहेको महाशाखाले जानकारी दिएको छ।
महाशाखाका अनुसार कोशी तराईको धेरै स्थानहरूमा लागेको हुस्सु, कुहिरो अपराह्नसम्ममा सुधार हुने सम्भावना देखिएको छ।
मधेस धेरै स्थानहरूमा लागेको हुस्सु, कुहिरो अपराह्नपछि सामान्य सुधार हुने सम्भावना रहेको महाशाखाले जनाएको छ। सुदूरपश्चिम तराईमा लागेको हुस्सुकुहिरो पनि अपराह्नपछि सामान्य सुधार हुने देखिएको महाशाखाले बताएको छ।
पश्चिमी वायुको प्रभाव देखिए पनि तत्काल कुनै वर्षाको सम्भावना छैन। मौसमविद् विनोद पोखरेलले आगामी दुई हप्तासम्म पनि वर्षाको सम्भावना नरहेको बताएका छन्।
पछिल्लो एक महिनायता मुलुकभर वर्षा मापन नभएको महाशाखाले जनाएको छ। महाशाखाका अनुसार गत मंसिर ५ गते ताप्लेजुङ ताप्लेथोक केन्द्रमा २ मिलिमिटर वर्षा रेकर्ड भएको थियो। त्यसयता एक झर पानी परेको छैन।
पानी नपरेकाले काठमाडौं उपत्यकालगायत देशका प्रमुख सहरहरूमा वायु प्रदूषण बढेको छ।
वातावरण विभागको वायु गुणस्तर अनुगमन प्रणालीका अनुसार पछिल्लो २४ घन्टामा सुर्खेतको वायु शुद्धता सूचकांक (एक्युआई) १७८, देउखुरी दाङको १५३, काठमाडौंको रत्नपार्कको १४७, भक्तपुरको १४६, खुमलटारको ११७ पुगेको छ।
वायु शुद्धता सूचकांकअनुसार ०–५० अंक स्वस्थ, ५१ देखि १०० अंक मध्यम र १०१ देखि १५० अंकसम्म अस्वस्थकर र त्यसभन्दा माथिको अंकलाई घातक मानिन्छ।
-1764045619.jpeg)
-1746009348.jpg)
