लुभु हत्याकाण्डमा अर्को शव पनि फेला परेको छ।
ललितपुर र भक्तपुरको सीमाना लाकुरेभञ्ज्याङको जंगलमा शव फेला परेको जिल्ला प्रहरी परिसर ललितपुरका एसएसपी होबिन्द्र बोगटीले जानकारी दिए।
‘लाकुरेभञ्ज्याङको जंगलमा बोरामा पोको पारेर शव फ्याँकेको रहेछ,’ उनले भने, ‘आज बिहान घटनास्थलमा शव भेटियो।’
भोजपुर गाउँपालिकाका २१ वर्षीय पारूहाङ राईको शव रहेको उनले बताए।
उनको हत्या मंसिर २५ गते नै भएको प्रहरीको अनुमान छ।
यो घटना लुभुमै इनारभित्र युवकको शव फेला परेकोसँग सम्बन्धित छ।
हिजो मात्र घटनामा संलग्न रहेको आरोपमा प्रहरीले एक जनालाई पक्राउ गरेको थियो। उनको बयानपछि अर्को पनि हत्या भएको खुलेको हो।
हत्यामा संलग्न रहेको आरोपमा प्रहरीले हिजो जयराम अधिकारीलाई पक्राउ गरेको थियो।
जयराम अधिकारी र देवराज ढुंगेलले हत्या गरेको देखिएको उनले बताए।
‘दुई जना भएर दुई जनाको हत्या गरेका रहेछन्,’ उनले भने, ‘जयरामलाई समातेपछि उसले घटनास्थल देखाएको थियो।’
सबै जना एउटै गाउँका साथी रहेको र पैसाको लेनदेन र रिसइबीमा हत्या भएको प्रहरीको प्रारम्भिक अनुमान छ।
‘पैसाको लेनदेन र रिसइबीले हत्या भएको देखिन्छ,’ उनले भने,‘ पैसा यति भन्ने छैन। अनुसन्धान पछि थाहा होला।’
यसअघि पुस २ गते हत्या गरी बोराभित्र राखेर इनारभित्र फ्याँकेको शव फेला परेको थियो। शव सिन्धुलीका २५ वर्षीय केशवराज हायुको हो।
दुवैलाई हत्या गर्न हम्मरको प्रयोग भएको देखिएको प्रहरीले बताएको छ।
घटनाबारे थप अनुसन्धान भइरहेको प्रहरीले बताएको छ।
-1746009348.jpg)
