रूसको राजधानी मस्कोमा सोमबार एक कार बम विष्फोटमा एक वरिष्ठ रूसी जनरलको मृत्यु भएको छ।
सोमबार बिहान आफ्नो कारमुनि राखिएको बम विष्फोट हुँदा रूसी जनरल स्टाफको 'अपरेशनल ट्रेनिङ' विभागका प्रमुख लेफ्टिनेन्ट जनरल फानिल सरवारोभको मृत्यु भएको हो।
रूसी अनुसन्धानकर्ताहरूले सो हत्यामा युक्रेनको संलग्नता हुन सक्ने आशंका गर्दै अनुसन्धान सुरू गरेको भनेर ब्लुमबर्गले लेखेको छ।
युक्रेनले भने यसबारे हालसम्म कुनै टिप्पणी गरेको छैन। युक्रेनमाथिको आक्रमणमा संलग्न रूसी उच्च अधिकारीहरू मस्कोमा बम आक्रमणमा परी मारिएको यो पछिल्लो १२ महिनामा तेस्रो घटना हो।
यसअघि अप्रिल महिनामा रूसी जनरल स्टाफको मुख्य अपरेसन निर्देशनालयका उपप्रमुख मेजर जनरल यारोस्लाभ मोस्कालिकको एक अपार्टमेन्ट बाहिर कार बम विष्फोटमा परी मृत्यु भएको थियो।
त्यस्तै, गत वर्षको डिसेम्बरमा मस्कोकै एक अपार्टमेन्ट बाहिर स्कुटरमा राखिएको बम विष्फोट हुँदा रूसको रेडियोलोजिकल, केमिकल र बायोलोजिकल रक्षा बलका प्रमुख लेफ्टिनेन्ट जनरल इगोर किरिलोभ र उनका सहायकको मृत्यु भएको थियो।
उक्त हत्याको अघिल्लो दिन मात्र युक्रेनको सुरक्षा सेवाले किरिलोभमाथि युक्रेनको पूर्वी र दक्षिणी भागमा प्रतिबन्धित रासायनिक हतियारहरूको 'व्यापक प्रयोग' गर्न आदेश दिएको आरोप लगाएको थियो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
