विश्वकप फुटबलको फाइनल खेल नेपाल टेलिभिजनको 'एनटिभी प्लस' बाट नि:शुल्क प्रसारण हुने भएको छ।
आज आइतबार राति १२:४५ बजे हुने अर्जेन्टिना र स्पेनबीचको फाइनल खेल एनटिभी प्लसबाट नि:शुल्क प्रसारण गर्न लागेको सञ्चार तथा सूचना मन्त्री विक्रम तिमिल्सिनाले बताएका छन्।
उनले विश्वकपका अन्तिम दुई खेल नि:शुल्क प्रसारण हुन लागेको जानकारी दिँदै फेसबुकमा लेखेका थिए, 'फिफा वर्ल्ड कप २०२६ तेस्रो स्थान र फाइनल खेलको नि:शुल्क प्रत्यक्ष प्रसाण एनटिभी प्लसले गर्नेछ।'
यस अनुसार तेस्रो स्थानका लागि आइतबार बिहान इंग्ल्यान्ड र फ्रान्सबीच भएको खेल एनटिभी प्लसमा प्रत्यक्ष प्रसारण भइसकेको छ।
यसअघि विश्वकपका खेलहरू हिमालयन स्पोर्ट्स र डिगो एपमार्फत शुल्क लिएर प्रत्यक्ष प्रसारण हुँदै आएकामा सरकारी टेलिभिजन च्यानलमा नि:शुल्क प्रसारण कसरी गरियो भन्नेबारे हामीले सञ्चारमन्त्री तिमिल्सिनासँग कुरा गरेका छौं।
यस वर्ष विश्वकपका खेलहरू प्रत्यक्ष प्रसारण गर्न एस्प्रो मिडियाले फिफाबाट अधिकार प्राप्त गरेको थियो। त्यसैअन्तर्गत टेलिभिजनतर्फ हिमालयन स्पोर्ट्स र ओटिटी/मोबाइल एपतर्फ डिगो एपलाई प्रसारण अधिकार दिने गरी सम्झौता गरिएको थियो।
हिमालयन स्पोर्ट्स च्यानल सब्स्क्राइब गर्न ९९९ रूपैयाँ र डिगो एपमा हेर्न मोबाइलबाट ५०० र डेस्कटपका लागि हजार रूपैयाँ तिर्नुपर्थ्यो।
फिफामा बिडिङ गरी प्रत्यक्ष प्रसारणको अधिकार प्राप्त गरेपछि नेपालभित्र क-कसले प्रसारण गर्ने भन्ने जिम्मेवारी त्यही मिडिया मातहत रहन्छ। प्रतियोगिता सुरू भएदेखि नै नेपाल टेलिभिजनमार्फत नि:शुल्क देखाउनुपर्छ भन्ने माग पनि हुँदै आएको थियो। संसदमा समेत यसबारे कुरा उठ्यो। तर बिडिङ गरी प्रसारण अधिकार लिनुपर्ने भएकाले त्यो सम्भव थिएन।
यसरी सुरूदेखि नै सशुल्क प्रसारण गरिँदै आएको विश्वकपका अन्तिम दुई खेल नि:शुल्क कसरी भयो?
हाम्रो यो प्रश्नमा सञ्चारमन्त्री तिमिल्सिनाले भने, 'सरकारी टेलिभिजनबाट नि:शुल्क देखाउनुपर्छ भन्ने सुरूदेखिकै माग थियो। तर सरकारी मिडियामार्फत फिफामा बिडिङ नगरिएकाले देखाउन सम्भव भएन। त्यही भएर सरकारले नेपालका लागि विश्वकपको प्रत्यक्ष प्रसारण अधिकार पाएको एस्प्रो मिडियालाई अनुरोध गरेर दुईवटा खेल नेपाल टेलिभिजनमा प्रसारण गर्न प्रक्रिया अघि बढाएको थियो।'
सरकारले गरेको अनुरोध अनुसार फिफाबाट अधिकारप्राप्त एस्प्रो मिडिया र नेपाल टेलिभिजनबीच सहमति भएर नि:शुल्क देखाउन सम्भव भएको उनले जानकारी दिए।
'सरकारको अनुरोधपछि एस्प्रो मिडिया र नेपाल टेलिभिजनबीच सहमति भएर प्रक्रिया अघि बढेको हो,' मन्त्री तिमिल्सिनाले भने, 'फिफाले आइतबार राति अबेर नेपाल टेलिभिजनबाट प्रत्यक्ष प्रसारण गर्न अनुमति दिएको थियो।'
हामीले यसबारे एस्प्रो मिडियाका सोम धितालसँग पनि कुरा गरेका छौं।
उनका अनुसार सरकारले सेमिफाइनल देखिकै खेलहरू नेपाल टेलिभिजनमा प्रसारण गर्ने अधिकार मागेको थियो। छलफल क्रममा तेस्रो स्थान र फाइनल गरी दुइटा खेल प्रसारण गर्न दिने सहमति भएको उनले जानकारी दिए।
'सरकारले नै आग्रह गरेपछि हामीले सहमति जनायौं। उहाँहरूले सेमिफाइनलदेखिकै खेलहरू प्रसारण गर्न दिनुस् भन्नुभएको थियो, पछि छलफलबाट दुइटा खेल मात्र प्रसारण गर्न दिने सहमति भयो,' उनले भने।
खेलको बीच-बीचमा बज्ने विज्ञापन प्रसारण गरेबापत् २२ लाख रूपैयाँ नेपाल टेलिभिजनलाई तिर्ने सहमति पनि भएको उनले जानकारी दिए।
