असोज २५ गते बूढीगण्डकी नदीमा आएको बाढीले गोरखाका उत्तरी क्षेत्रका बस्ती, बजार, पुल तथा सडकमा ठूलो क्षति पुर्याएको छ।
बाढीले आरूघाट गाउँपालिकास्थित सोती र मान्बु जोड्ने मोटरेबल पक्की पुल बगाउनुका साथै सोती बजार सहित नदी किनारका विभिन्न बस्तीमा क्षति पुर्याएको छ।
बाढीले धार्चे गाउँपालिका–५ स्थित माछिखोला बजारमा रहेका घर, पसल तथा अन्य भौतिक संरचनामा ठूलो क्षति गरेको छ। केरौँजा जाने झोलुङ्गे पुल समेत बगाएको बाढीले सल्लेरी र जगत बजारमा पनि व्यापक क्षति पुर्याएको छ।
चुमनुब्री गाउँपालिका–६ स्थित खारोङ र उङजुलुङको बीचमा सुख्खा पहिरो खसेर स्यार खोला थुनिएपछि एक्कासी थुनिएको पानी फुटेर बूढीगण्डकी नदीमा ठूलो बाढी आएको बताइएको छ।
बाढीले नदीको बहाव बढाउँदा तटीय क्षेत्रका बस्ती डुबान तथा कटानमा परेका छन्।
बाढीले पैयू र बगर गाउँका ३५ घर बगाएको बताइएको छ। दोभान, घट्टेखोला, जगत र सल्लेरी गाउँमा समेत व्यापक क्षति पुगेको छ।
बाढीले आरूघाट गाउँपालिका–५ स्थित शान्तिबजारका अधिकांश घर बस्न नमिल्ने अवस्थामा पुर्याएको छ।
स्थानीय राजकुमार खत्रीका अनुसार शान्तिबजारका ५८ घरधुरीमध्ये अधिकांश घरमा ठूलो क्षति पुगेको छ। बूढीगण्डकी नदीले धार परिवर्तन गर्दै बस्तीमा पसेपछि स्थानीयका घर, पशुचौपाया तथा घरायसी सामग्री बगाएको हो।
बाढीबाट विस्थापित परिवारलाई नेपाल रेडक्रस सोसाइटीले त्रिपाल उपलब्ध गराएको छ। स्थानीय इन्द्रबहादुर आले मगरका अनुसार शान्तिबजारमा २७ परिवार त्रिपालमा बस्दै आएका छन्।
धार्चे गाउँपालिका–५ माछिखोलाका स्थानीय लालप्रसाद गुरूङको गोदाममा मात्रै करिब दुई करोड रुपैयाँ बराबरको क्षति भएको छ।
बाढीले धार्चे गाउँपालिका–२ केरौँजाको मुख्य आवतजावत मार्गमा रहेको पुल तथा खोर्लाबेंसीको पुलमा समेत क्षति पुर्याएको छ। पुलमा क्षति पुगेपछि स्थानीयको आवागमन तथा सामान ढुवानी प्रभावित भएको छ।
बाढीका कारण गोरखाका उत्तरी क्षेत्रका बस्तीका साथै सडक, पुल र बजारमा ठूलो क्षति पुगेपछि स्थानीयको जनजीवन प्रभावित बनेको छ।
बाढीबाट विस्थापित परिवारको पुनःस्थापना, क्षतिग्रस्त पुल तथा सडकको पुनर्निर्माण र जोखिममा रहेका बस्तीको सुरक्षाका लागि तत्काल पहल आवश्यक देखिएको छ।
तस्बिरहरू:
-1793083469.jpg)
-1793083469.jpg)
-1793083469.jpg)
-1793083468.jpg)
-1793083467.jpg)
-1793083467.jpg)
-1793083467.jpg)
-1793083468.jpg)
-1793083466.jpg)
-1793083466.jpg)
-1793083466.jpg)
-1793083466.jpg)
-1793083465.jpg)
-1793083465.jpg)
-1793083465.jpg)
-1793083465.jpg)
-1793083464.jpg)
-1793083464.jpg)
सबै तस्बिर: नेपाल फोटो लाइब्रेरी
