सोमबार दिउँसो रूकुम पश्चिमको आठबिसकोट नगरपालिका-५ नयाँ डाँडामा भएको जिप दुर्घटनामा परेर गम्भीर घाइते भएका पाँच जनालाई हेलिकप्टरमार्फत उद्धार गरिएको छ।
भे १ च ३११२ नम्बरको डबल क्याप जिप दुर्घटना हुँदा दुई जनाको घटनास्थलमै मृत्यु भएको थियो भने १३ जना घाइते भएका थिए।
घाइतेमध्ये गम्भीर अवस्थाका पाँच जनालाई नेपाली सेनाको हेलिकप्टरमार्फत् उद्धार गरेर सुर्खेतस्थित कर्णाली प्रदेश अस्पताल लिइएको हो।
जिल्ला प्रहरी कार्यालय रूकुम पश्चिमका प्रहरी नायब उपरीक्षक (डिएसपी) वेदबहादुर पौडेलले घाइतेहरू आठबिसकोट नगरपालिका ५ निवासी १९ वर्षीया जुना कुमारी थापा, २५ वर्षीय गाडीधनी वीरबहादुर थापा, २७ वर्षीया सीता थापा, २३ वर्षीया जुनी थापा र ८ वर्षीय युवराज थापालाई हेलिकप्टरमार्फत सुर्खेत लिइएको जानकारी दिए।
दुर्घटनामा परेर आठबिसकोट नगरपालिका ५ निवासी १० वर्षीय हरि बहादुर थापा र सोही वडाका २९ वर्षीय लक्ष्मीराम थापाको घटनास्थलमै मृत्यु भएको छ। त्यसैगरी दुर्घटनामा घाइते भएका अन्य आठ जनाको आठबिसकोट नगर अस्पतालमा उपचार भइरहेको छ।
घाइतेहरू आठबिसकोट नगरपालिका ५ का २५ वर्षीया हिरा थापा, २ वर्षका गौरव थापा, ४ वर्षीया बिरता थापा, २३ वर्षीया सुशिला थापा यरी, २८ वर्षीया भावना थापा यरी, २७ वर्षीया खिममाया थापा, आठबिसकोट नगरपालिका २ निवासी २० वर्षीया रमिता थापा र सोही वडा निवासी १९ वर्षीया निर्मला यरीको नगर अस्पतालमा उपचार भइरहेको छ।
सबैको अवस्था मध्यम रहको प्रहरीले जनाएको छ।
आठबिसकोट ५ को थापा गाउँबाट सोही वडाको नयाँ डाँडा जाने सडकबाट करिब १५० मिटर तल जिप खसेर दुर्घटना भएको हो।
जिप चालक आठबिसकोट नगरपालिका-४ निवासी २५ वर्षीय प्रदिप विक फरार रहेको र खोजी भइरहेको प्रहरीले जनाएको छ।
