हिरासतमा रहेका इनम सापकोटासँग आर्थिक कारोबार देखिएको आरोपमा पक्राउ परेका महेश श्रेष्ठविरूद्ध सम्पत्ति शुद्धीकरण सम्बन्धी कसुरमा अनुसन्धान अघि बढाइएको छ।
उनीविरूद्ध मंगलबार जिल्ला अदालत काठमाडौंबाट सम्पत्ति शुद्धीकरणसम्बन्धी कसुरमा ५ दिन म्याद थप गरेर अनुसन्धान अगाडि बढाइएको हो।
महेश कात्तिक २८ गते कीर्तिपुरबाट पक्राउ परेका थिए।
जिल्ला प्रहरी परिसर काठमाडौंको एसपी दानबहादुर थापाका अनुसार महेशको इनमसँग आर्थिक कारोबार भएको देखिएपछि नियन्त्रणमा लिइएको थियो।
'उनीहरूबीच के कनेक्सन थियो भन्नेबारेमा थप अनुसन्धान हुनेछ,' एसपी थापाले भने।
महेश नेपाली कांग्रेसका नेता उमेश श्रेष्ठका भाइ हुन्।
इनमलाई प्रहरीले असोज १४ गतेदेखि नियन्त्रणमा लिएर अनुसन्धान गरिरहेको छ। उनलाई दिल्ली जान लागेका बेला त्रिभुवन अन्तर्राष्ट्रिय विमानस्थलबाट पक्राउ गरिएको थियो।
पूर्वप्रधान न्यायाधीश चोलेन्द्रशमशेर जबराको मोबाइल परीक्षणका क्रममा सापकोटासँग नियमित सम्पर्क भएको देखिएपछि प्रहरीले इनमलाई पक्राउ गरेको थियो।
त्यसपछि उनीविरूद्ध सम्पत्ति शुद्धीकरण, बैंकिङ कसुर र विदेशी विनिमयसम्बन्धी विषयमा अनुसन्धान भइरहेको छ।