गृहमन्त्रीकी आमा भनेर एक महिलाको भिडिओ हालेको भन्दै प्रहरीले चलचित्र पत्रकार शालिकराम न्यौपानेलाई पक्राउ गरेको छ।
जिल्ला प्रहरी परिसर काठमाडौंले न्यौपानेलाई मंगलबार पक्राउ गरेको एसपी दानबहादुर थापाले जानकारी दिए।
उनकाअनुसार ४९ वर्षीय महिलाले वैयक्तिक गोपनीयतासम्बन्धी कसुरमा निवेदन दिएपछि न्यौपानेलाई पक्राउ गरेको हो।
‘एक महिलाले वैयक्तिक गोपनीयतासम्बन्धी कसुरमा निवेदन दिनुभएको थियो। त्यही निवेदनको आधारमा पक्राउ गरिएको हो। आज ५ दिनको म्याद थप भएको छ,’ उनले भने।
उनलाई जिल्ला अदालत काठमाडौंले ५ दिन हिरासतमा राख्न अनुमति दिएको हो। न्यौपानेसँगै अरू दुई जनालाई पनि प्रहरीले पक्राउ गरेको छ। कालिकोटका छत्र बोगटी र दोलखाका नवरत्न तामाङलाई पनि प्रहरीले मंगलबार नै पक्राउ गरेको हो।
भिडिओमा देखिएकै महिलाले निवेदन दिएको एसपी थापाले बताए। सामाजिक सञ्जालमा सार्वजनिक भएको भिडिओमा महिलाले आफू गृहमन्त्री सुधन गुरूङकी आमा भएको दाबी गरेकी छन्।
तर यस विषयमा आफूलाई जानकारी नभएको एसपी थापाले बताए।
यस्तै पक्राउ परेका पत्रकार न्यौपानेकी श्रीमतीले मंगलबारदेखि आफ्ना श्रीमान् सम्पर्कमा नरहेको भन्दै प्रहरीकहाँ निवेदन दिएकी थिइन्। उनले प्रहरी वृत्त सिंहदरबारमा आफ्ना श्रीमान् खोजिदिन अनुरोध गर्दै निवेदन दिएकी छन्।
परिवारलाई यसबारे किन जानकारी नगराइएको भन्ने प्रश्नमा एसपी थापाले भने, ‘उहाँ आज कता सिंहदरबार जानुभएको भन्ने सुनेको थिएँ। यहाँ सोध्नुभएको भए त थाहा नै थियो।’
पक्राउ गर्दा जानकारी गराउनुपर्ने त थियो होला नि?
‘पक्राउ गरिसकेपछि नजिकको कानुन व्यवसायी कसलाई भेट्न चाहनुहुन्छ? परिवार कसलाई भेट्न चाहन्छौं भनेर सोध्छौं। मानव अधिकारसँग सम्बन्धित विषयवस्तु हो,’ उनले भने।
उसो भए निवेदन नै दिन जानुपर्ने अवस्था आउने गरी जानकारी नदिइएको देखियो नि?
‘उहाँले फोन नम्बर उपलब्ध गराउनुभएन होला,’ उनले भने, ‘कहिलेकाहीँ उहाँहरूले कसैलाई नभेट्ने भन्न पनि सक्नुहुन्छ। प्रहरीले नियन्त्रणमा लिइसकेपछि चाहि वकिल र परिवारलाई सम्पर्क गर्ने विषयमा सोध्छौं।’
उनी चलचित्र पत्रकार संघका सदस्य समेत हुन्।