जारी विश्वकपमा बिहिबार वेस्ट इण्डिज र डिफेन्डिङ च्याम्पियन अस्ट्रेलिया भिड्दै छन्। दुबै टोली एकअर्काविरूद्ध ट्रेन्ट ब्रिज मैदानमा उत्रिनेछन्। दुबै टोलीले यस विश्वकपमा आफ्नो पहिलो खेल एकतर्फी रूपमा आफ्नो पक्षमा पारेका थिए।
आज हुने खेलमा दुबै टोलीबीच कडा प्रतिष्पर्धा हुने अनुमान गरिएको छ। दुबै टोली यस विश्वकप उपाधिका प्रबल दाबेदार हुन्। दुबैले पहिलो खेलबाट आफूहरू उत्कृष्ट प्रदर्शन दिन आएको छनक दिइसकेका छन्।
वेस्ट इण्डिज क्रिस गेल, आन्द्रे रसेल, कार्लोस ब्रैथवेटजस्ता ठूलो ठूलो सट खेल्ने ब्याटस्म्यानले सुसज्जित रहेको छ। त्यस्तै उनीहरूले पाकिस्तानविरूद्धको पहिलो खेलबाट उनीहरू बलरहरू पनि कम नभएको छनक दिइसकेका छन्।
सो खेलमा ओशाने थाेमसले दमदार बलिङ गरेका थिए भने शेल्डन कार्टरेल, कप्तान जेसन होल्डर तथा रसेलले पनि आफ्नो योगदान दिएका थिए।
उता अस्ट्रेलियाको बलिङ पाकिस्तानको भन्दा बलियो छ। एरोन फिन्च तथा डेविड वार्नरको सलामी जोडी पनि शानदार फममा रहेकाले वेस्ट इण्डिजका बलरहरू चनाखो हुनुपर्नेछ।
त्यसैगरी यी दुईका अलावा उस्मान ख्वाजा र स्टीवन स्मिथको ब्याटिङ पनि गतिलो फममा नै छ जसले वेस्ट इण्डिजलाई गतिलै चुनौती दिनेछ।
यसैगरी ग्लेन म्याक्सवेल, एलेक्स कैरी तथा मार्कस स्टोइनिस पनि छिटोछिटो रन जोड्नमा माहिर छन्।
अस्ट्रेलियाबाट वार्नर, फिन्च वा स्मिथ मध्ये एकमात्र ब्याटिङमा चले भने पनि उनीहरूले ठूलो स्कोर बनाउन सक्छन्। यस कारणले इण्डिज चनाखो हुनुपर्नेछ।
यसैगरी धेरैलाई थाहा छ , इण्डिजको ब्याटिङको कुनै टुङ्गो हुँदैन।
यो टोली ४०० को पारी पनि पुग्नसक्छ भने २०० रन भित्रै पनि समेटिन सक्छ। तर वर्तमान ब्याट्स्म्यानहरूको प्रदर्शन हेर्दा टोली सस्तैमा समेटिन मुश्किल देखिइरहेको छ।
इण्डिजलाई ब्याटिङमा फास्ट बलिङले दुःख दिने सम्भावना छ। मिशेल स्ट्राक जस्ता बलरको अगाडि इण्डिजका ब्याट्स्म्यानलाई त्यति सजिलो भने हुनेछैन। यसैगरी प्याम कमिङ्स, नाथन कल्टर नाइल तथा स्टेइनिस जस्ता बलर पनि खेलमा कडा रूपमा प्रस्तुत हुनेछ। स्पिनमा एडम जाम्पाको विकल्प पनि अस्ट्रेलियालाई छ।
टिम अस्ट्रेलियाः एरोन फिनच (कप्तान), जेसन बेहरनडार्फ, एलेक्स कैरी (विकेटकिपर), नाथन कल्टर नाइल, पैट कमिङ्स, उस्मान ख्वाजा, नाथन लायन, शन मार्श, ग्लैन मैक्सवेल, केन रिचर्डसन, स्टीव स्मिथ, मिशेल स्टार्क, मार्कस स्टोइनिस, डेविड वार्नर, एडम जाम्पा।
टिम वेस्ट इण्डिज : जेसन होल्डर (कप्तान), क्रिस गेल, इविन लुइस, डारेन ब्रावो, शिमरोन हेटमायेर, एशले नर्स, फाबियान एलेन, आन्द्रे रसेल, कार्लोस ब्रैथवेट, निकोलस पूरन (विकेटकिपर), शाई होप (विकेटकीपर), केमर रोच, ओशाने थोमस, शेनन गैब्रिएल, शेल्टन काटरेल।