राउण्ड रविनका ९ मध्ये पहिलो ३ खेल लगातार गुमाएको दक्षिण अफ्रिकालेआज आफ्नो चौथो खेल वेस्ट इण्डिजसँग खेल्दैछ।
आजको खेलमा पनि हार बेहोरेमा उसका लागि सेमिफाइनलको यात्रा कठिन हुने पक्का छ। दुबै टोली आज इङ्ल्याण्डको रोब बल मैदानमा जितको लक्ष्यसाथ उत्रनेछन्।
पहिलो जितको खोजीमा रहेको दक्षिण अफ्रिका लागि वेस्ट इण्डिजसँगको खेल चुनौतीपूर्ण नै रहेको छ। पछिल्लो समय दक्षिण अफ्रिकी टोलीको फम गतिलो छैन भने इण्डिजका खेलाडीहरू आफ्नो उत्कृष्ट लयमा छन्।
सेमिफाइनल यात्रा तय गर्नका लागि दक्षिण अफ्रिकाले बाँकी रहेका ६ म्याचमा आफ्नो सर्वश्रेष्ठ प्रदर्शन दिनुपर्नेछ। पहिलो खेलमा पाकिस्तानलाई पराजित गरेको वेस्ट इण्डिज दोश्रो म्याचमा अस्ट्रेलियासँग निकटको पराजय भोगेको थियो। यी दुबै म्याचमा उसले राम्रो खेल प्रदर्शन गर्यो।
डेल स्टेन चोटका कारण विश्वकपबाट बाहिरिएका छन् भने लुंगी एनगिडी पनि घाइते भएकाले आजको खेलमा हुने-नहुनेमा ठूलै शंका छ।
स्टेनको सट्टा आज मैदानमा ब्यूरोन हेन्डरिक्सले मौका पाउने सम्भावना छ। बलिङतर्फ यस्तो भएपनि उसको मूख्य चिन्ता ब्याटिङ हो। पहिलो जित हासिल गर्नका लागि उसले वेस्ट इण्डिजका तीन बलरहरू डटेर सामाना गर्नुपर्ने चुनौती छ। यस विश्वकपमा अहिलेसम्म हाशीम अमला, क्विंटन डि कक, फाप चु प्लेसिस, रासी वान डेर डुसेनले अपेक्षित प्रदर्शन गर्न सकेका छैनन।
दक्षिण अफ्रिकाको यो अवस्था भएपनि वेस्ट इण्डिज ढुक्क हुने अवस्थामा पनि छैन। पछिल्लो दुई खेलमा आफ्नो स्भाविक लय पस्केको भएपनि वेस्ट इण्डिज अस्ट्रेलियाविरूद्धको खेलमा सट चयनमा चुकेको थियो। उसको हारको मूख्य कारण पनि यहि बन्यो। कागिसो रबाडा जस्ता बलरका अगाडी इण्डिजका ब्याटस्म्यानहरूको सानो असावधानीले अनपेक्षित नतिजा दिन सक्छ।